Портпаролката на опозициската партија, Богданка Кузеска осврнувајќи се и на други случаи, денеска на прес-конференција рече дека не станува збор за изолирани инциденти, туку за системски распад на безбедносниот апарат, бидејќи, како што кажа, полицајци кои треба да не чуваат, работат за интересите на криминалци, моќници и тајкуни
Случајот со непрописно паркираното возило во Дебар Маало, според опозицискиот Социјалдемократски сојуз (СДСМ), е најновиот скандал кој покажува дека со министерот Панче Тошковски на чело на Министерството за внатрешни работи по улиците во земјава се случува хаос, безбедноста е загрозена и нема никаков ред и поредок.
Ставот на СДСМ во врска со случајот денеска на прес-коннференција го изнесе портпаролката на партијата, Богданка Кузеска, која рече дека МВР „се сведе на тоа да не може ниту еден џип неправилно паркиран да санкционира“.
„Скандалот во Дебар Маало по којзнае кој пат го потврди нефункционирањето на МВР ама го покажа и каубојското аздисување на бодигардите на функционерите на власт. Двајца полициски службеници, обезбедувачи на претседателката на државата лажно тврделе дека погрешни паркираното „порше“ на Срѓан Керим е службено. Тие барале „поршето“ на Керим да не биде кренато од пајакот, тие поттикнале неказнивост“, рече Кузеска.
Да не била реакцијата на младите, наведе таа, и овој случај ќе бил заташкан, но по нивните бурни реакции, МВР било принудено да поведе дисциплинска постапка.
Во овој контекст, таа се осврна и на други случаи, во кои изминатиот период од доаѓањето на новата Влада биле инволвирани лица од обезбедувањето на носителите на највиоските државни функции.
Кузеска го наведе случајот со членот на обезбедувањето на премиерот Христијан Мицкоски против кого е отворена истрага за одавање на службени тајни.
„Од обезбедувањето на премиерот Мицкоски, едниот оддавал државни тајни другиот нападна полицаец попречувајќи акција против дрога. Обезбедувањето на Гаши направи инцидент на скопскиот аеродром, извади пиштол, турна и нападна полицаец.
Сега обезбедувањето на претседателката (на државата) е вмешано во скандалот во Дебар Маало“, рече Кузеска.
Според СДСМ, не станува збор за изолирани инциденти, туку за системски распад на безбедносниот апарат, бидејќи, како што кажа, полицајци кои треба да не чуваат, работат за интересите на криминалци, моќници и тајкуни.
„На чело на сите нив е Панче Тошковски – како министер кој го дозволи овој распад во МВР. Сите овие инциденти отвораат сериозни прашања за целосна нефункционалност за безбедносниот апарат, за можната поврзаност на луѓе од власта со криминални структури. Нема ред и поредок, нема одговорност. Вака не може! Одговорност мора да има и таа мора да започне со најодговорниот, а тоа е министерот Панче Тошковски“, рече Кузеска.
Министерството за внатрешни работи покрена дисциплинска постапка против двајца полициски службеници кои лажно тврделе дека непрописно паркираното возило пред угостителски објект во скопско Дебар Маало е службено. Се работи за полицајци кои биле дел од Одделението за лично обезбедување на претседателот на РСМ.
Од Министерството дадоа и хронологија на настанот кој се случил на 22 март годинава, а за кој јавноста дозна вчера по објавена видеоснимка на социјалните мрежи.