Имајќи ги предвид пред се случувањата во државата и моментумот во којшто се наоѓа Северна Македонија во овој период, којшто е многу клучен за процесите коишто понатаму треба да следуваат, ЦО едногласно донесе одлука претседателот и премиерот да ја одложи оставката на одредено време, додека овие процеси не се нормализираат, изјави претседавачот со ЦО, Перо Костадинов, по седницата
Извршниот и Централниот одбор на СДСМ вечерва едногласно донесоа одлука премиерот и лидер на партијата, Зоран Заев, да ги одложи оставките на одредено време, додека не се нормализираат процесите во државата, изјави претседавачот на ЦО на СДСМ, Перо Костадинов, по вечерашните седниците на двете партиски тела.
„ЦО, имајќи ги предвид пред се случувањата во државата и моментумот во којшто се наоѓа Северна Македонија во овој период, којшто е многу клучен за процесите коишто понатаму треба да следуваат, едногласно донесе одлука претседателот и премиерот да ја одложи ставката на одредено време, додека овие процеси не се нормализираат“,
изјави Костадинов.
Според Костадинов, генералната одлука што е донесена е дека моментот пред којшто е исправена Северна Македонија е многу значаен и сите треба да бидеме на висината на задачата, бидејќи голема е цената.
„Не треба да потенцирам дека државата после многу години режим продолжува и се гради на европските вредности, на вистинските демократски и слободарски вредности. Ова е слободна земја во која принципите на единството, принципите на соживотот, се клучна наша водилка и затоа СДСМ се исправува на висина на таа задача и наредниот период ќе работи во интересите на граѓаните и на можноста која е исправена пред нас, државата да западне во нова криза и да биде ставена во некој ретроградни процеси“,
потенцира Костадинов.
„Дискутиравме за најразлични случувања на македонската политичка сцена и во моментот е најбитно парламентарното мнозинство да продолжи по патот којшто е многу битен, пред се, за земјава. Земјава не смее да ги напушти тие процеси и тие политики и секако дека сите процеси се битни и сите ние сме чинители на истите тие процеси. И чекор по чекор пред се треба да го смириме граѓанството и да не правиме фатализам од сите работи, но пред се ние како земја не смееме да си дозволиме нови години на уназадување, нови години во коишто ќе биде нарушен демократскиот капацитет пред се и прогресивните европски можности кои се отвораат пред нас“,
истакна Костадинов.
За тоа дали на седниците станало збор за одговорност за резултатите на локалните избори, Костадинов потенцира дека се дискутирало за сите состојби и за одговорноста.
„На крајот не треба да заборавиме дека претседателот лично си поднесе оставката и сите ние како ЦО таа оставка ја почитуваме, но ЦО недвосмислено, единствено, едноставно бараше да биде одложено пред се поради моментумот во којшто се наоѓа Северна Македонија“,
истакна Костадинов, потенцирајќи дека според партискиот Статут, ако претседателот е во оставка, тоа исто важи и за највисокото раководство на СДСМ и за потпретседателите и генералниот секретар, а истото важи и во случај кога тоа се одложува.
Дали на оваа одлука ќе влијае она што ќе се случува во четврток во Собраието, Костадинов рече дека во СДСМ ќе има и други седници, дека многу работи можат да влијаат, но одлуката која е донесена ќе се постапува по неа.
Во врска со ставот на ЦО за новото парламентарно мнозинство, Костадинов само кажа дека во моментов има најразлични случувања на македонската политиччка сцена и најважно е парламентарното мнозинство да продолжи по патот кој е најважен за земјата.
„Секако дека сите процеси се битни и сите се чинители во нив и чекор по чекор треба да го смириме граѓанството и не смееме како земја да си дозволиме нови години на уназадување во услови кога се отвораат европски можности пред нас“,
рече тој.
Како шпекулации го оцени прашањето дали нема да влезат во сала ако има седница в четврток за гласање недоверба на Владата.