Демократијата, за која по крајот на Студената војна бевме уверени дека нема реална алтернатива, денеска е под жесток напад на популистички и авторитарни тенденции, рече македонскиот претседател во видеообраќањето на 75. сесија на ГС на ОН, кое првпат во историјата заседава виртуелно
Нашиот регион сѐ уште се соочува со нерешени политички и историски спорови, кои имаат потенцијал да нѐ вратат во деведесеттите години на минатиот век. Решението за овие проблеми лежи само во надминување на историските митови, излезот сигурно не е во идеологиите од 19 век за етничка и верска доминација.
Ова го изјави македонскиот претседател Стево Пендаровски во своето прво обраќање пред Генералното собрание на ОН, чија 75. сесија, првпат во историјата на светската организација, се одржува виртуелно, така што водачите на земјите членки ги одржуваат своите говори преку видео, наместо во живо, поради пандемијата со ковид-19.
Зборувајќи за регионот, Пендаровски, во говорот од неговата резиденција на Водно, оцени дека е многу важно инвестициите да не се сведат на вложување само во економиите.
„Демократијата, за која по крајот на Студената војна бевме уверени дека нема реална алтернатива, денеска е под жесток напад на популистички и авторитарни тенденции. Доколку сакаме да ја задржиме моралната супериорност на демократијата во однос на другите модели на политичко управување, мораме да инвестираме во неа, особено меѓу младите генерации. Во таа смисла, еден од фундаменталните предизвици пред нас е да вложуваме во едукацијата за демократските вредности за да ги потиснеме разбудените радикални идеологии, како неофашизмот, ултранационализмот и расизмот. Тоа е задача за државите и за формалното образование, но не помалку и за системот на неформалното образование, како и за граѓанското општество“,
рече Пендаровски посочувајќи дека, за да биде успешна, оваа битка треба да се води на повеќе фронтови истовремено, така што секоја држава, секој народ и секоја организација може да даде свој придонес, а предуслови за да се постигне целта се ефективна меѓународна соработка и глобална солидарност.
Во овој контекст, Пендаровски се осврна и на договорите со Грција и со Бугарија што ги постигна нашата земја.
„Како мала држава во Југоисточна Европа, внесовме дополнителна стабилност во регионот решавајќи, со посредство на ОН, еден комплексен спор со нашиот сосед Грција. Сега договореното го спроведуваме во добра верба, од што корист ќе имаат и нашите две држави, но и регионот во целина. Истовремено, подготвени сме, сите отворени прашања, да ги решаваме низ дијалог на рамноправни субјекти, за што значаен пример е Договорот за добрососедство и соработка со нашиот сосед Република Бугарија“,
рече Пендаровски.
Македонскиот претседател говореше и за кризата што на глобално ниво ја предизвика ковид-19.
„Ковид-19 е само уште една во целиот спектар од кризи со кои се соочуваме како човештво и ниту една од нив не е целосно изолирана од другите. Здравствената криза е истовремено и економска и социјална бидејќи предизвикува сиромаштија, а сиромаштијата е плодна почва за екстремизам и конфликти. Конфликтите ги загрозуваат човековите права и слободи и предизвикуваат хуманитарни катастрофи и бегалски бранови. Овој вител на кризи и закани генерира страв, неизвесност и недоверба и ги поларизира односите меѓу државите, но и внатре во државите, и конечно, го поткопува мултилатерализмот, кој денес ни е повеќе од потребен. Денес, наместо постојниот статичен поредок настанат по Втората светска војна, потребен ни е функционален и динамичен систем на споделени правила и принципи во кои веруваме, приспособени на новото време. Неопходен ни е нов модел на активен, инклузивен мултилатерализам, препознатлив по солидарноста меѓу нациите и хуманоста, меѓу луѓето. Во овој контекст, една од големите задачи на ОН е да ни помогнат да го задржиме фокусот и да ја држиме будна колективната свест и совест за глобалното добро“,
нагласи Пендаровски.
