Институтот за национална историја, каде што директор е Драги Ѓоргиев, минатата недела излезе со соопштение во кое се наведува дека евроинтеграциите на македонската нација не смее да се условуваат со ултимативно прифаќање на влијанија и историски вистини од други национални историографии
Македонскиот народ се соочува со отворено оспорување на националната историја, јазикот и идентитетот, поконкретно со сите традиционални вредности, кои се во тесна врска со македонизмот како фундамент на нацијата и државноста. Лимитирањето на слободата на научното творење и наметнување на „историски вистини“, е во целосна спротивност со базичните вредности на кои почиваат европските демократии. Оттаму и реакциите на интелектуалците, кои се обединуваат натпартиски со критика на ваквите оспорувања, оцени на вечерашниот протест во Скопје, организиран од ВМРО-ДПМНЕ, Маја Ангеловска-Панова, актуелна претседателка на Советот на Институтот за национална историја (ИНИ).
Во почетокот на своето обраќање, Ангеловска – Панова рече дека зборува од позиција на својата професија, како некој што се занимава со проучување на македонската средновековна историја и што директно е засегнат од актуелните состојби во професионална смисла.
„Како генерација, денес сме сведоци на оспорување на македонската национална историја, што се базира на конструирани историографски тези од 19 век, кои се наметнуваат како непроменлива историска константа и единствена догматизирана историска вистина. Ваквите тенденции се крајно неприфатливи“,
рече таа.
ИНИ, каде што директор е Драги Ѓоргиев, копретседател од македонска страна на историската комисија со Бугарија, минатата недела излезе со соопштение во јавноста, во кое се наведува дека евроинтеграциите на македонската нација не смее да се условуваат со ултимативно прифаќање на влијанија и историски вистини од други национални историографии.
“Институтот нема да ја подреди својата научна дејност на какви било политички влијанија“,
се наведува во соопштението.
Професори од Институтот за национална историја се оградија од соопштението, посочувајќи дека тоа не е усогласено со сите научни соработници во ИНИ, туку дека било донесено само од членови на Советот. На седницата на шестчлениот Совет присуствувал и Ѓоргиев, како директор на ИНИ, ама тој немал право на глас.
Потоа, со свои ставови во врска со случувањата на релација со Софија, се огласија и првите луѓе на УКИМ, МАНУ и на МПЦ, преку заеднички документ насловен „Македонски манифест“.
По интервјуто на премиерот Зоран Заев за бугарската агенција БГНЕС, ВМРО-ДПМНЕ секојдневно одржува протести и поставува блокади во центарот на Скопје. Потпретседателот на ВМРО-ДПМНЕ, Александар Николоски, на вечерашниот протест изјави дека Заев не ставил потпис за распарчување на државата, затоа што се исплашил од народот кој излегува на протестите.