Љупчо Петковски, истражувач во областа на европските прашања и демократизацијата во вечерашната дебата на „360 степени“ коментирајќи ги последните изјави за можното раздвојување на С Македонија и Албанија на патот кон ЕУ направи споредба со ситуацијата кога во 2019 година, Франција имаше поголеми резерви кон напредокот на Албанија.
„Македонија сега е во истата позиција како што беше Албанија во 2019 година кога Франција имаше резерви кон двете држави, но имаше малку повеќе резерви кон Албанија. Актерите и позициите се исти како тогаш, само Македонија и Албанија ги заменија местата“,
вели Петковски.
Тој додава дека и тогаш и сега Германија беше против раздвојувањето, како што рече, поради политичкиот залог да испорачаат резултат и за Албанија и за С Македонија.
Темата за раздвојувањето ја отвори еврокомесарот за проширување Оливер Вархеји, кој во своите изјави рече дека доколку С Македонија не го реши спорот со Бугарија, може да се размислува процесот да го продолжи само со Албанија. Следеа мноштво реакции на земји-членки и функционери на ЕУ повторувајќи ги нивните статови дека процесот за двете земји треба да се одвива заедно.