Осврнувајќи се на безбедносните случувања и последиците врз Балканот, Пендаровски алармирал и на важноста за деблокада на македонските евроинтеграции и изнаоѓање конструктивно решение за недоразбирањата со Бугарија
Претседателот Стево Пендаровски денеска ја прими Карен Донфрид, помошник-државна секретарка за европски и евроазиски прашања во Стејт департментот на САД. Во фокусот на разговорите биле билатералните односи, актуелните случувања во земјата и текот на реформските процеси, како и надворешнополитичките приоритети на Северна Македонија низ призмата на актуелните случувања во регионот и Европа, информираат од кабинетот на претседателот
Според Пендаровски, доаѓањето на Донфрид во Западен Балкан е потврда за силната американска поддршка за регионалната стабилност и за важноста од понатамошна консолидација на демократските процеси во регионот.
„Исто така, претседателот истакна дека Северна Македонија е подготвена да придонесе за понатамошен развој на билатералните односи и зајакнување на стратешкото партнерство со САД. Остануваме цврсто посветени на спроведување на реформите за борба против организираниот криминал и корупцијата, и во таа насока особено ја цениме американската поддршка, додаде претседателот Пендаровски. Tој го поздрави билатералниот стратешки дијалог со САД како позитивен импулс во меѓусебните односи за унапредување на соработката во областа на одбраната, безбедноста, владеењето на правото, економијата, енергетиката и климатските промени“,
се вели во соопштението.
На средбата соговорниците дискутирале и за политичката динамика и економската ситуација во Европа, предизвикана од руската инвазија врз Украина, при што претседателот Пендаровски ги потенцирал преземените мерки од страна на Северна Македонија како земја-членка на НАТО и го реафирмира ставот за целосна усогласеност со заедничката надворешна и безбедносна политика на ЕУ.
Осврнувајќи се на безбедносните случувања и последиците врз Балканот, Пендаровски алармирал и на важноста за деблокада на македонските евроинтеграции и изнаоѓање на конструктивно решение за недоразбирањата со Бугарија, додаваат од кабинетот на претседателот.
Со оглед на актуелните случувања во Украина и на европскиот континент, претседателот додаде дека неопходно е преговорите за членство во ЕУ да започнат што побрзо, поради ризикот од поткопување на поддршката за европската интеграција и забавување на темпото на реформските процеси како владеење на правото, реформи во судството и борба против корупцијата.