Од Акционерското друштво за изградба и стопанисување со станбен и деловен простор, кое управува со арената, велат дека станува збор за болеста „Питиум“ (растителен паразит) и дека првите проблеми се појавиле кон крајот на јуни. „Од страна на нашите стручни служби веднаш беше пристапено кон третирање на болеста и ново просејување со семиња и прихрана. Квалитетот на теренот беше доведен до задоволително ниво, поради што УЕФА даде зелено светло за одржување на натпреварот со Италија. Сепак, кусиот период до следниот натпревар, во случајов со Италија, не дозволи целосна реконструкција, а дополнителен проблем беше и фактот дека во меѓувреме на стадионот беа одиграни неколку клупски меѓународни натпревари поради кои тревата дополнително се оштети“, велат од компанијата
Еден гол. Еден бод. Во светот на фудбалот некогаш доволно за шампионска титула. За македонски услови… против четирикратен светски шампион, двократен европски и еднаш олимписки… бод голем колку планина. Но колку лошата состојба на теренот на арената „Тодор Проески“ придонесе за финален резултат 1:1 против Италија?
„Беше многу тешко да доминираме на ваков терен“,
изјави италијанскиот селектор Лучијано Спалети.
“Chiedo scusa a tutti gli italiani“ – „Им се извинувам на сите Италијанци“, изјави за италијанскиот национален сервис РАИ, фудбалерот на македонската репрезентација и шампион на Серија А со Наполи, Елиф Елмас.
Никој не се извинуваше, но месец и половина пред Италија, за теренот на Националната арена „Тодор Проески“ се жалеа фудбалерите на Левски од Софија, кога му гостуваа на Шкупи во рамките на квалификациите за Лигата на конференции.
Дел од домашниот печат тогаш критиката ја насочи кон бугарскиот клуб, дека „Бугарите дојдоа во Скопје и најдоа мана“ или дека „Бугарите го нарекоа ‘нива’ теренот во Скопје“.
Како и да беа примени овие поплаки дома, останува фактот дека теренот на националната арена служеше за потсмев на насловните страни на италијанските, а претходно и на бугарските медиуми. Зошто се дозволи такво нешто и како да не се повтори?
За разлика од бугарскиот тим, италијанските репрезентативци одлучија воопшто да не тренираат кога дојдоа во Скопје за дуелот со Северна Македонија на 8 септември. Само се прошетаа по теренот, за да нема дополнителни оштетувања и евентуални повреди на играчите.
Но, за стручњаците, теренот е ист за сите. Мудроста во фудбалот е тактичката поткованост. За шампионскиот стратег Лучијано Спалети, кој дебитираше на клупата на Италија, натпреварот во Скопје се покажа разочарувачки. Една од причините за неочекуваното реми во Скопје, Спалети го припиша на теренот.
„Разочарани сме што не ја искористивме предноста, но беше многу тешко да доминираме на ваков терен. Тие успеаја да го искористат единственото решение кое го имаа, а тоа е да го освојуваат теренот преку високи нафрлувања и отскокнувања на топката“,
изјави селекторот на Италија.
Терените низ светот бележат паралелен напредок со технологијата, не и „Градски“
Успешното одржување на еден фудбалски терен можеби не е едноставна работа, но основните принципи се поставени пред 6 децении. Уште во 60-тите години од минатиот век, стадионот „Гудисон парк“ во Англија имплементира дренажен систем. Потоа, се воведува и подно греење, сè со цел тревата да не мрзне и да има идеални услови преку цела година. Денес, некои стадиони во светот комплетно се трансформираат, теренот влегува под трибините, а кровот може и да се затвора. Арената „Тодор Проески“ не е толку современа, но теренот има подно греење, дренажа и вграден систем за наводнување. Па, сепак, теренот против Левски и Италија беше срамен.
Од Акционерското друштво за изградба и стопанисување со станбен и деловен простор, кое управува со арената, за „360 степени“ велат дека проблемот е што тревата ја нападнал паразит.
„Укажуваме дека проблеми од овој тип не беа регистрирани во претходниот период, односно пред натпреварот со Украина. Теренот на стадионот беше позитивно оценет од страна на УЕФА. По извесен период, кон крајот на јуни, констатирано е дека тревата е заболена од болеста питиум (растителен паразит)“,
се вели во објаснувањето на АДСДП.
Од државната фирма велат дека презеле итни мерки, но дека теренот не може да се санира преку ноќ.
„Од страна на нашите стручни служби веднаш беше пристапено кон третирање на болеста и ново просејување со семиња и прихрана. Квалитетот на теренот беше доведен до задоволително ниво, поради што УЕФА даде зелено светло за одржување на натпреварот со Италија. Сепак, кусиот период до следниот натпревар, во случајов со Италија, не дозволи целосна реконструкција, а дополнителен проблем беше и фактот дека во меѓувреме на стадионот беа одиграни неколку клупски меѓународни натпревари поради кои тревата дополнително се оштети“,
потенцираа од АДСДП за „360 степени“.
ФФМ: Принудени сме да играме на Националната арена, друг ваков стадион немаме
Дали состојбата на теренот беше тактички трик? Во разговор со „360 степени“, портпаролот на Фудбалската федерација на Македонија, Златко Андоновски, целосно ги отфрла ваквите теории. Како и останатите клубови, и тие плаќаат рента за да игра репрезентацијата.
„Она што е најважно за фудбалската федерација, не само во овој момент, туку години наназад е јавноста да знае дека овој стадион не е во сопственост, ниту го стопанисува ФФМ. Ние само имаме договор за одигрување натпревари до февруари 2025 година. За жал, инфраструктурно од овој степен, Македонија има само еден стадион, а тоа е националната арена и тоа е причината зошто сме приморани натпреварите на А-репрезентацијата да ги играме на нашиот најголем стадион“,
изјави Андоновски.
И покрај тоа што плаќаат за да играат на „Тодор Проески“, од ФФМ потенцираат дека се подготвени тие да постават нов терен, т.н. хибриден – дел природна, дел вештачка трева.
„Сето тоа е процес којшто трае. ФФМ нема официјален став дека ќе прави било што… интензивно се преговара за условите под кои ФФМ и ПУИГ би соработувале и во иднина. Наша основна цел е репрезентацијата да има најдобри услови не само за натпревари, туку и сè што е вклучено во организацијата, од логистика до патување, сè што е неопходно за добри резултати. За жал, последниот период тоа не беше така“,
рече Андоновски.
Според него, ако теренот не се санира на еден или на друг начин, дури и македонските репрезентативци ќе одбијат да играат на „Тодор Проески“.
„Не верувам дека македонските фудбалери на ваков начин би се согласиле да играат нов натпревар на ваков тревник. Сликата кажува сè“,
рече портпаролот на ФФМ при разговорот со „360 степени“.
Теренот на арената „Тодор Проески“ сега е во многу подобра состојба. Нивата на која се жалеа бугарските новинари и Италијанците, вродила со плод.
Сепак, одблизу, а и оддалеку е видливо дека ќе биде потребно повеќе време и постојан труд за теренот на Националната арена да се доведе во добра состојба. Барем приближно на квалитетот во 2017 година, кога Скопје беше домаќин на европскиот Супер куп во кој играа Манчестер Јунајтед и Реал Мадрид.
Следниот натпревар македонската фудбалска репрезентација нема да го игра во Скопје. Пријателскиот натпревар против Ерменија на 17 октомври ќе се одигра на стадионот „Благој Истатов“ во Струмица.