Погледнете го новото издание на емисијата „360 степени”, емитувано на 4 март 2024 г. на МРТ 1, во кое гостуваат Бојан Маричиќ, прв вицепремиер и секретар за меѓународна соработка на СДСМ, и Тимчо Муцунски, потпретседател на ВМРО-ДПМНЕ и градоначалник на Аеродром
Во новото издание на емисијата „360 степени“ на МРТ 1 донесуваме одделни интервјуа со првиот вицепремиер во Владата и секретар за меѓународна соработка на СДСМ, Бојан Маричиќ, и со потпретседателот на ВМРО-ДПМНЕ и градоначалник на Општина Аеродром, Тимчо Муцунски.
Маричиќ го прашуваме зошто службено возило го донесе за да даде потпис за Стево Пендаровски, дали ги фрустрира тоа што во неделата (3 март) Силјановска собра повеќе потписи од Пендаровски, какви се релациите меѓу СДСМ и ДУИ, дали министрите на ДУИ ја напуштиле седницата на Владата на која се разгледувале предлог-законите за стратешките инвестиции, дали ДУИ ќе го поддржи Пендаровски во вториот круг, можно ли е лидерот Ковачевски да биде носител во Изборната единица 2 (Куманово) наместо во ИЕ 1 (Скопје), а Венко Филипче во „четворката“, како ќе изгледа идната влада…
Муцунски, пак, одговара на прашања за тоа дали за нив е разочарувачки тоа што Силјановска во неделата не собра многу повеќе потписи од Пендаровски, каков епилог очекуваат од претседателската трка, на што мисли Ванковска кога во одговор до Мицкоски вели дека „се отепала од работа“ во 2019 г. и дека лидерот на ВМРО-ДПМНЕ многу добро го знае тоа, дали доскорешниот претседател на МАНУ, Љупчо Коцарев, ќе биде носител на пратеничката листа на ВМРО-ДПМНЕ во Изборната единица 5, колку е остварливо барањето на Мицкоски за 61 пратеник на парламентарните избори, како одговара на критиките дека ВМРО-ДПМНЕ од партија што ќе го враќаше старото уставно име сега се обидува да ја забрза замената на лични документи со новото име, дали ако дојдат на власт во вербалните изјави ќе го користат името Република Северна Македонија…