Причина за несреќата во центарот на Марсеј во Франција, која се случила околу еден часот по полноќ, според шефот на марсејската полиција Кристоф Мирман, е силна експлозија која предизвикала огромен пожар. Пожарникарите неколку часа безуспешно се обидуваат да го изгаснат пожарот, па затоа се стравува дека во несреќата има загинати.
„Треба да се подготвиме дека може да има уште жртви во оваа страшна драма“,
рече градоначалникот на Марсеј, Беноа Пајан.
Повредени се пет лица од соседната зграда. Целата област околу зградата и повеќе улици е затворена. Во спасувањето учествуваат над 100 пожарникари, полицајци и граѓани спасувачи.
„Имаме стотина луѓе на терен, приоритет е да се изгасне пожарот и да се отстранат рушевините, за да можеме да започнеме со извлекување на затрупаните лица“,
рече претставник на пожарникарите.
Станарите од соседната зграда се евакуирани и сместени во училиште во близина на местото на несреќата.