Лидерот на ВМРО-ДПМНЕ, Христијан Мицкоски, вели дека е подготвен со Владата да ги сподели нивните предлози за надминување на кризата од коронавирус. Тој на денешната прес-конференција рече дека на Владата и е потребна помош, а иста така и на државата.
„Затоа јас подавам рака. Подготвен сум, ако треба, да дојдам во Влада да ги презентирам решенијата и, на крај, да ги спроведеме најдобрите мерки за граѓаните. Имаме три главни чекори за излез од кризата. И претходно дававме решенија кои беа прво одбивани, а потоа се спроведуваа“,
рече Мицкоски.
Тој додаде дека е подготвен да ги одбрани неговите решенија за излез од кризата и да го направи тоа што е најдобро за граѓаните. Мицкоски рече дека ова е време за конструктивност, а не политиканство.
Тој им се обрати и на министрите и им порача да не креваат паника и да не соопштуваат дека немало пари за администрацијата.
Ако не знаат како да се справат, додаде Мицкоски, нека се повлечат од позициите и нека остават државата да ја водат луѓе кои знаат како да ги решаваат проблемите.
„Едно е битката да се санираат последиците од пандемијата но и од економската криза, а онаа позначајната и поважната битка е како во услови на ваква пандемија и како во услови на ваква економска криза да го раздвижиме стопанството да може да создава производ, да може да создава додадена вредност за да ја одржиме економијата онолку колку што можеме за да веднаш после првиот ден откако ќе престане оваа криза и здравствена и финансиска го достигнеме максимумот и зошто да не и повеќе од тој максимум“,
додаде Мицкоски.