Во пријавата подносителот ја обвинува Ивановска за несовесно работење поради начинот на кој предметот бил презентиран пред јавноста
Во однос на сомнежот за политички притисок што Ивановска претходно го сподели со јавноста, кога објави дека полицијата ја барала дома за да ѝ ја достави поканата истиот ден кога објави дека се кандидира за градоначалник на Центар, вели дека не сака да верува во тоа сценарио. Според неа, предизборието е можност да се провери до каде е државата со лекцијата по демократија
Поранешната претседателка на Државната комисија за спречување корупција и кандидатка за градоначалник на Центар, Билјана Ивановска, се појави во Основното јавно обвинителство Скопје во врска со кривичната пријава поднесена против неа. Распитот траеше околу еден час, а Ивановска во Обвинителството дојде во придружба на својот адвокат.
Пријавата, како што кажа Ивановска по излегувањето од Обвинителството, е поврзана со предмет што го отворила Антикорупциската комисија во периодот кога таа беше претседателка на ДКСК. Во пријавата подносителот ја обвинува Ивановска за несовесно работење поради начинот на кој предметот бил презентиран пред јавноста.
„Во конкретниот предмет бил оформен предмет по сопствена иницијатива и тоа од член на нашата комисија. Предметот се работел и на крај е без некои наоди, постапката е завршена без никакви сомнежи понатаму, но она што било спорно за пријавувачот е начинот на кој ние сме комуницирале со јавноста, а вие знаете дека како ДКСК бевме премногу транспарентни можеби и ги споделувавме информациите со јавноста без проблем околу тоа“,
кажа Ивановска.
Пријавителот е познат, но Ивановска не го откри името ниту, пак, спорниот предмет за кој е поднесена кривичната пријава против неа.
„Истражната постапка не била за споделување со јавноста, меѓутоа нема ништо спорно, ја објаснив убаво постапката. Ми беше посочено да не споделувам, ќе излезе брзо одлуката, кога ќе ми биде доставена ќе го споделам и тој момент за да не попречувам во процедурата сега“,
посочи Ивановска.
Во однос на сомнежот за политички притисок што Ивановска претходно го сподели со јавноста, кога објави дека полицијата ја барала дома за да ѝ ја достави поканата истиот ден кога објави дека се кандидира за градоначалник на Центар, вели дека не сака да верува во тоа сценарио. Според неа, предизборието е можност да се провери до каде државата е со лекцијата по демократија.
Но, сепак, според Ивановска, останува отворено прашањето дали Обвинителството на ист начин постапува со сите пријави.
„Мислењето на ефикасноста за обвинителството е такво какво што е и тоа остава простор за сомнежи, не само кај мене, туку општо кај граѓанството. Ако Јавното обвинителство постапувало ревносно секогаш и за кратко време ги доставувало пријавите каде што треба, тогаш никој не би се посомневал – зошто сега, зошто утре. Оттука се сомнежите. Прашањето ми е дали сите пријави што биле архивирани на 25 јули се доставени на 14 август кај тие што треба да ги примат и тоа од страна на полиција“,
додаде Ивановска.
Ивановска на 14 август објави дека ќе се кандидира за градоначалничка на Центар како независна кандидатка поддржана од иницијативата „Независни заедно“, а следниот ден преку својот профил на Фејсбук објави дека полицијата вечерта ѝ доставила кривична пријава.
Од Обвинителството тогаш известија во случајот со Ивановска станува збор за покана за испитување и оти таа на ниту еден начин не се поврзува со нејзините политички активности.