Тимот на македонскиот документарец „Медена земја“, кој денеска доби две номинации за „Оскар“, објавата ја дочека во Еквадор.
Режисерот Љубомир Стефанов на својот Фејсбук профил објави видео заедно со кинематографот Самир Љума и режисерката Тамара Котевска.
Какви се нивните реакции кога ќе слушнат за двете номинации за нивниот филм погледнете од видеото.
„Пред сѐ, би сакале да им се заблагодариме на членовите на Американската академија (AMPAS) за тоа што ја вклучија ‘Медена земја’ во трката за најпрестижната филмска награда на светот.
Преку жената која случајно ја сретнавме, пред светот се отвори приказна – алегорија на една глобална слика каде што хуманото и натуралното се борат да преживеат.
Атиџе и пчелите се прототип за новиот генски материјал, кој треба да победи во битката на титаните, каде што природата се бори со деструктивното.
Среќни сме што светските критичари и членовите на Академијата го препознаа крикот на планетата, кој ечи меѓу фрејмовите во филмот. Ја открија големината на човекот преку големината на единката. Се разнишаа убедувањата дека радоста се крие во поседувањето.
Ова е првпат во историјата на ‘Оскарите’ документарен филм да е номиниран во две категории, што значи дека ова не е само успех со историски размери, туку потврдува дека документариот јазик влегува во ерата на негово вистинско вреднување, каде што стои рамо до рамо со фикционалната нарација, а поради својата реалност, заслужува посебна опсервација. Провоцира искрено сочувство, кое не се заборава по гледањето на филмот.
Големо е достигнувањето на филмот. Големи се фестивалите, кои го слават и величаат. Но уште поголема треба да биде промената на која се надеваме. Таа промена тргнува од секој од нас поединечно.
Филмот повикува на скромност, а кога ја гледаме љубовта во очите на гледачите, силно веруваме дека пораката е препознаена и дека скромноста е новото време низ кое со радост ќе зачекориме.
Уште еднаш, бескрајна благодарност до членовите на Академијата што филмот го нарекоа – МАТЕРИЈАЛ ЗАСЛУЖЕН ЗА ОСКАР“, напишаа тие на Фан страницата на Фејсбук на Медена земја.
*Поврзана вест