-Немаме двоумење, ние би прифатиле таков предлог, кажа лидерот на Алијансата за Албанците, Зијадин Села, по средбата со премиерот Димитар Ковачевски
Францускиот предлог е прифатлив за Алијансата за Албанците. Ова го изјави лидерот на партијата, Зијадин Села, по средбата со премиерот Димитар Ковачевски, која е дел од најавените широки консултации за модифицираниот предлог на француското претседателство за надминување на спорот со Бугарија и за отпочнување на преговорите со ЕУ. Сели вели дека Северна Македонија нема алтернатива, освен што побрзу да стане земја-членка на ЕУ, а натаму, смета тој, се оди низ договори и преговори.
„Јасен е нашиот став дека спорот треба да се реши почнувајќи од основното. Ако имаш проблем меѓу соседи, соседите мора да почнат да сe признаваат меѓу себе. Пред Самитот во ЕУ се изјаснив дека не се работи само за прифаќање или неприфаќање на францускиот предлог, туку се работи за продолжување или не по патот на евроинтеграциите. Мислам дека тој треба да биде пристапот на политичките чинители. Мислам дека Северна Македонија треба да продолжи кон евроинтеграциите, друга опција за нас како држава не треба да постои… Немаме двоумење, ние би прифатиле таков предлог“,
изјави Села по средбата со премиерот Ковачевски.
Лидерот на Алијанса вели дека на средбата Ковачевски истакнал дека во предлогот, македонскиот јазик е зачуван.
„Со премиерот дел од дебата ја имавме и во врска со македонскиот јазик и нормално дека ние ги разбираме, ние сме живееле и живееме во една држава за да се разбереме меѓу себе. Го разбираме и емоционалното чувство на сите граѓани. Премиерот инсистираше дека македонскиот јазик е зачуван, не се работи за промени. Јас ја искористувам ова можност да им упатам апел на сите граѓани. Се надевам дека конечно нè сфаќаат и нас, после повеќе од 20 години, како се чувствуваат Албанците, кога за албанскиот јазик во оваа држава дефиницијата е куп зборови и само зборот албански не постои. Дефиницијата е – јазикот кој го зборуваат најмалку 20 посто од граѓаните и кој е различен од македонскиот јазик, мислам дека за Албанците е омаловажувачки и не треба да стои таква дефиниција и се надевам дека кога ќе се отвори Уставот ќе треба да се има предвид и оваа дефиниција… Алијансата за Албанците ќе инсистира на ова како политичка партија“,
кажа Села.
Зачленувањето на Северна Македонија во ЕУ, според Села, има геополитичко значење и политичарите треба повеќе да размислуваат за стабилноста на регионот, а помалку за добивање на политички поени.
Од Владата соопштија дека на средбата премиерот Ковачевски истакнал оти е потребено државничко однесување за просперитет на сите народи во Северна Македонија.
„Премиерот Ковачевски нагласи дека Владата работи со што поголем консензус и секогаш во интерес на граѓаните и уште еднаш ги потврди ставовите дека потребни се мудри одлуки и заедничка одговорност која ќе ни обезбеди европска иднина. Во разговорите Ковачевски истакна дека во европскиот предлог имаме дефинирани позиции за јасно и недвосмислено прифаќање на македонскиот јазик, што беше најважното прашање за нас – македонскиот јазик е апсолутно чист и еднаков со другите јазици на Европската Унија без никакви фусноти, дообјаснувања и ѕвездички. Премиерот истакна дека овој конечен европски предлог овозможува безусловен старт на пристапните преговори на Република Северна Македонија со ЕУ и операционализација на одлуката на Европскиот совет од март 2020, со што преговорите со ЕУ ќе можеме да ги започнеме веднаш по донесувањето на нашата одлука за прифаќање на предлогот“,
соопшти владината прес-служба по завршувањето на средбата Ковачевски-Села.
Широките консултации за францускиот предлог почнаа во петокот најпрво со коалиционите партнери во Владата, од кои дел веќе се изјаснија позитивно за предлогот, а дел се очекува тоа да го сторат во следниот период. Вчера, премиерот Ковачевски имаше средба и со лидерот на најголемата опозициска партија Христијан Мицкоски. За ВМРО-ДПМНЕ, францускиот предлог е неприфатлив.
Францускиот предлог вчера беше разгледан и од страна на Советот за безбедност кој го свика претседателот на државата Стево Пендаровски.
Предлогот во земјава пристигна во четвртокот по што премиерот Ковачевски најави широк консултативен процес со владината коалиција, претседателот на државата, Парламентот, опозицијата, како и со граѓанскиот сектор, експертската и севкупната јавност во земјата.
САД и ЕУ во одделни објави вчера ја поздравија дебатата за ревидираниот предлог на ЕУ за почеток на пристапните преговори.