Некогашната пратеничка на ВМРО-ДПМНЕ Ѓулистана Марковска се приклучува кон ставовите на повеќемина поранешни функционери на партијата дека е потребно да се одржи вонреден конгрес за да се тестира довербата во партиското раководство по јулските избори.
„И за него, а и за членството, а особено за ВМРО ДПМНЕ и за демократските процеси во Македонија ќе биде исклучително корисно да се одржи конгрес. Доколку тој го потврди својот мандат на конгресот ќе му биде со среќа и тогаш ќе биде неприкосновен претседател кој го поминал и редовниот и вонредниот конгрес, без оглед на тоа дали се работи за добиени или изгубени избори“,
вели Марковска за Алсат.
Во текот на денот, и поранешниот пратеник Филип Петровски одржа прес-конференција пред Собранието, оценувајќи дека Зоран Заев се враќа за премиер благодарение на Мицкоски.
По неколкудневното отсуство на Мицкоски од јавна сцена, Иницијативата за вонреден конгрес му порача на лидерот на ВМРО-ДПМНЕ да не се крие и да се огради од заканите и притисоците со кои се соочуваат поранешни функионери на партијата, за што се известени и странските дипломати во Скопје.