Силно невреме проследено со град денеска ги зафати северните делови на Италија. Според италијанските медиуми, паѓал град со големина на тениско топче, а на североистокот на Милано дури е забележано и помало торнадо. Најлошо поминал северниот дел на Ломбардија.
Службите за итни случаи во Милано примиле над 100 повици за поплави, оштетени покриви и паднати дрвја. Дел од медиумите пренесуваат и дека на два покрива избувнал пожар откако биле погодени од гром. Засега нема информации за жртви.
Moment when destructive tornado tears through #Milan #Tornado #Storm #Italy #Lombardy #Naviglio #Cernusco #Gessate #Balsamo #Bubbiano #Viral #Weather #Climate #Tornadoes #Italia pic.twitter.com/ZsJmONhARf
— Earth42morrow (@Earth42morrow) July 21, 2023
Бурата веќе стигнала и до Словенија. Црвено предупредување е издадено за Западна и Централна Словенија во периодот од 14 до 18 часот. На западот на Словенија од 13 до 17 часот е на сила црвена тревога, а во централниот дел од Словенија од 13 до 18 часот.
Во Хрватска е издаден портокалов метеоаларм за поголемиот дел од земјата, со можна појава на невреме во сабота навечер. Портокаловото предупредување поради невремето утре е на сила за регионот на Загреб и Осиек бидејќи можноста за невреме со грмотевици во тие два региона е над 70 отсто.
За останатиот дел од Хрватска е издадено жолто предупредување, а за дубровничкиот регион на сила е црвено предупредување поради топлотниот бран.
Словенија, Хрватска, Србија и БиХ пред два дена беа зафатени од разорно невреме проследено со дожд, силен ветер и грмотевици. Во невремето загинаа шест лица. Од нив, четворица во Хрватска и по еден во Словенија и во БиХ.