Пожарот се наоѓа во атарот на селото Селемли, но поминува преку линијата од фронтот од Првата светска војна, линија на која има многу заостанати минско експлозивни неексплодирани средства, информира директорот на ЦУК
Голем пожар избувна денеска околку границата со Грција, помеѓу Богданци и Дојран, каде што поминува линијата од фронтот од Првата светска војна и на која досега експлодираа најмалку четири гранати, информира директорот на Центарот за управување со кризи (ЦУК), Стојанче Ангелов.
„Денеска околу пладне изби голем пожар помеѓу Богданци и Дојран. Пожарот се наоѓа во атарот на селото Селемли, но поминува преку линијата од фронтот од Првата светска војна, линија на којашто има многу заостанати минско експлозивни неексплодирани средства. Во текот на овие два часа, колку што е пожарот активен, слушнати се најмалку четири силни експлозии. Ваквите експлозии го усложнуваат гаснењето на пожарот, бидејќи не е безбедно пожарникарите да се приближат до него“,
рече Ангелов, кој веќе се упатил кон локацијата каде што се наоѓа пожарот.
Пожарот, како што информира тој, е изгаснат само на еден крак каде што било безбедно пожарникарите да пријдат, а останатиот опожарен дел се гаси со „ертракторите“ на Дирекцијата за заштита и спасување, кои користат вода со посебна пена со поголем ефект.
„Двата ‘ертрактори’ на ДЗС веќе се активни. Исфрлија по неколку тури вода. Ќе продолжат да дејствуваат сè додека пожарот целосно не го изгаснат. Пожарот, меѓу другото, се движи и кон грчка територија и според сегашните информации на едно место веќе е префрлен на грчка територија“,
информира Ангелов.
Директорот на ЦУК соопшти дека преку системот 112, уште пред да се префрли пожарот на грчка територија, тамошните служби биле известени за да се подготват.