Министерот за здравство, Венко Филипче, во вечерашното интервју на „360 степени“ рече дека во Грција ќе може да се влезе со потврда за примена на која било вакцина против ковид-19, но како алтернатива ќе биде и влез со негативен ПЦР-тест.
Според Филипче, иако кинеската вакцина на „Синофарм“ најверојатно нема да биде регистрирана во Европската медицинска агенција, во Грција ќе може да се влезе со потврда за имунизација од оваа вакцина, но засега не се знае каква ќе биде одлуката на останаттие земји од Европската унија по однос на ова прашање.
Грција најави дека од 14 мај ќе ги отвори границите за туристи, а таму ќе може да патуваат и државјани на С Македонија. Освен можноста за влез со потврда за вакцинација против ковид или приложување на негативен ПЦР-тест, веројатно на граничниот премин ќе има проверка и со антиген брз тест по случаен избор на патниците.
„Разговарав со министерот за здравство од Грција и го прашав дали ќе има некаква селекција по однос на вакцините, но рече дека нема да има. Односно дека потврда за примена која било вакцина ќе биде еден од начините да се влезе во Грција, алтернативно на тоа ќе биде влез со негативен ПЦР-тест, но и тестирање на граница по случаен избор со брз антигенски тест. Но, до 14 мај за кога е најавено отворањето на границите со Грција ќе ги знаеме сите детали“,
рече Филипче.
Во однос на условите за влез во останатите земји-членки на ЕУ нема одлуки, но има одредени најави.
„Можно е да ги признаат само вакцините кои се одобрени од ЕМА, меѓутоа ова не е дефинитивно потврдено. Мое лично мислење е дека не треба да се прави дискриминација по однос на типот на примената вакцина, бидејќи сè уште тешко се стигнува до вакцините. До 2022 година ќе има производствени капацитети на сите вакцини од сите производители, но сега тоа сè уште не е така, затоа сметам дека не треба да се дискриминира по однос на која вакцина е примена“,
вели Филипче.