Станува збор за булеварот „Хасан Приштина“ (од булеварот Словенија до Обиколницата) и втората фаза од булеварот „Македонија“, со што оваа собраќајница конечно ќе влезе во подземната улица под комплексот „Дајмонд“
И на едниот и на другиот тендер се пријавени исти фирми, а веќе има наводи дека јавната набавка е скроена за еден понудувач
Речиси секој работен ден во срцето на главниот град владее сообраќаен хаос. И, не само во центарот. Еднакво нервозно е и на периферијата, како на пример кај Момин Поток.
Решението за метежот кај Момин Поток се гради веќе четврта година. Го почна тогашниот скопски градоначалник Петре Шилегов, токму пред локалните избори во 2021 година. И, случајно или не, повторно пред избори, се најавува нова фаза.
Во бараката 1А во седиштето на град Скопје, на 21 февруари, во просторија не поголема од десетина квадрати, се отворија понудите на тендерот за изградба на булеварот „Хасан Приштина“.
Ги имаше четири на број. Ју-бај 2 амет ДООЕЛ, од скопско Бојане, понуди да ја заврши работата за околу 9,4 милиони евра. Гранит АД, побара 8,7 милиони. Слична беше цената и на Топ Билд. Најниско и тоа значително помалку од другите, понуди конзорциумот од Ленди Груп, Машиникоп и Фабрика Карпош.
Тоа не беше само обично отворање понуди бидејќи тендерот веќе предизвика контроверзи.
Кога првпат се распиша огласот, на условите се пожали Гранит АД. До Комисијата за жалби по јавни набавки аргументираа дека несразмерно се бара:
– да може да се пријават само фирми кои имаат лизгачки систем за подупирање на ров со длабочина од минимум 4 метри…опрема која се користи за изведба на водоводни/фекални канализации, а такви зафати нема во тендерот за булеварот;
– да може да се пријават само фирми кои имаат минимум 8 багери со зафатнина на корпата од 3 кубни метри, кога со толку и такви багери би се ископало се за 16 дена, а рокот на изведба е 730 дена;
– да може да се пријават само фирми кои имаат сопствена асфалтна база во радиус од 50 километри и тоа со капацитет од 240 тони на час.
„Непобитен е фактот од прегледот кој го дефинира растојанието, како и од интегрираните дозволи на базите кои се во делокруг од 50 км, кое е барање од тендерските услови, дека само еден економски оператор исполнува услови, односно е со база со бараниот капацитет од 240 тони/час“,
се вели во дел од Решението на Државната комисија за жалби по јавни набавки.
Па, бидејќи бил препознаен ризикот за, народски кажано, тендерот да биде наместен, постапката била поништена. Трката која сега се води, всушност, е втора.
Допрва ќе се одлучува кој ќе победи бидејќи на крај ќе има електронско наддавање, при што цената е главен, но не и единствен фактор. Ќе победи оној со најдобро оценет однос помеѓу цената и квалитетот.
Идејата за тоа како треба се да изгледа на терен беше најавена уште во 2021 година од тогашниот градоначаник Петре Шилегов и вицепремиерите Фатмир Битиќи и Артан Груби.
Се градеше долго, но кружниот тек на булеварот „8 Септември“ е првиот чекор. На следниот уште се работи, а тоа е кружниот тек кој ги спојува „8 Септември“ и „Никола Карев“. Од таму, без семафори, ќе се продолжува кон Визбегово и булеварите „Словенија“ или „Хасан Приштина“, за накај обиколницата и границата со Косово.
Но, се доцни многу. Побаравме став од Град Скопје на чело со градоначалничката Данела Арсовска. Не добивме ништо повратно.
Денот е 24 февруари. Бараката е истата – 1А. Како и просторијата – не поголема од десетина квадрати. Три дена по „Хасан Приштина“, се отвораат понудите за уште еден капитален проект – втората фаза од изградбата на булеварот „Македонија“.
Пред комисијата има три понуди, сите три од компании што конкурираа и за булеварот „Хасан Приштина“.
„Гранит“ понуди да ги заврши работите предвидени со тендерската документација за 14,6 милиони евра. Конзорциумот составен од Ленди Груп, Машинокоп и Фабрика Карпош побара 13,3 милиони. Значително најевтина беше понудата на „Топ Билд“ – 9,8 милиони евра.
И тука ќе има електронска аукција, а за победник ќе се избере економскиот оператор чија понуда ќе се процени како најповолна врз основа на односот меѓу цената и квалитетот.
А што треба да се гради? Станува збор за зафат кој значително ќе го промени ликот на центарот на градот, а со тоа и протокот на сообраќајот. Од јавно достапните документи и описот во достапната документација, Фаза 2 предвидува изградба на делот од булеварот „Македонија“ кој се пресекува со булеварите „11 Октомври“ и „Борис Трајковски“ до пресекувањето со булеварот „Кочо Рацин“ и улицата „Павел Шатев“, каде треба да се направат два нови кружни тека. Градежните зафати, во оваа фаза, завршуваат со изградба на рампи кои ќе го поврзат булеварот „Македонија“ со подземната сообраќајница изградена во темелите на комплексот „Дајмонд“.
Штом се заврши целото поврзување на булеварот „Македонија“, наместо механизацијата и лимот коишто се гледаат кај Лимак, ќе има влез и излез од тунел во должина од 750 метри којшто завршува некаде околу цветниот пазар во Капиштец.
И на другиот крај на тунелот ќе бидат потребни значителни зафати, кога ќе дојде времето за тоа.
Наместо раскрсницата кај Министерството за образование којашто води до „Водњанска“ предвиден е кружен тек. Од двете страни ќе има влез и излез од тунелот којшто го спојува овој дел на градот со булеварот „Македонија“.
Побаравме, но не добивме одобрение да го посетиме подземниот дел од сообраќајницата под комплексот „Дајмонд“.
Понудите се на маса. Прашањето сега е дали изборот ќе биде успешен. Ако се избере најдобар понудувач и се потпише договор, на терен веројатно нема да има нешто повеќе од камен-темелници и камери, барем не до изборите.
Ако има волја кај следниот градоначалник или градоначалничка на Скопје, новите булевари можеби и ќе ја потсмират сообраќајната нервоза за некој година.