Една од првите пациентки во земјава која беше заразена и го победи коронавирусот, реши со песна преку социјалните мрежи да ги охрабри пациентите кои сè уште се во болница и се борат со вирусот.
Станува збор за Михаела Јаневска од Скопје, која веднаш по пристигнувањето со авион во земјава сама се пријави во болница.
„Откако се изборив со коронавирусот и ја напуштив болницата со два негативни теста, се чувствувам како најсреќниот човек на светот. Многу сум среќна што сум конечно дома, бидејки своеволно отидов директно од авион во болница. Големо благодарам до сите доктори и медицински сестри кои се грижеа за мене и продолжуваат да се грижат за сите останати. Денеска пеам за сите нив и за сите пациенти кои се се уште во болница. Ова е за вас“,
напиша Михаела споделувајќи видео во кое го пее хитот „Stand by me“.
Нејзината објава ја сподели и министерот за здравство, Венко Филипче, кој и се заблагодари за одговорноста.
„Голема благодарност и до тебе Михаела! Благодарам што го препознаваш трудот на здравствените работници и што си одговорна кон своите сограѓани. Михаела беше меѓу првите пациенти заболени од коронавирусот, а денес таа е целосно опоравена. Сама се пријави на Клиниката за инфективни болести и фебрилни состојби, веднаш по пристигнување на скопскиот аеродром и за време на целото патување носеше заштитна опрема“,
напиша Филипче.
