„Јас знам за мојата мајка, секој ден гледав да ѝ го продолжам животот и на крај ќе се најдат некои директори, министри, убијци кои за моќ и сопствени пари ќе го уништат животот на човекот“, зборуваше еден од говорниците на протестот
Дождот што врне вечерва во Скопје не ги спречи демонстрантите да го продолжат протестот од пред Владата кон зградата на Јавното обвинителството.
Протестот се одржува по последните медиумски објави и отворената предистрага за случувањата на Клиниката на онкологија, каде што има сомнежи дека се краделе терапии за болни од рак и се продавале на црниот пазар, додека на пациентите им се давал физиолошки раствор.
Кон обвинителството демонстрантите стигнаа движејќи се по рута преку мостот „Гоце Делчев“ и скандирајќи „оставка“ и „убијци“.
Пред да се упатат кон следната дестинација, имаше едноминутен молк за починатите пациенти на Онкологија, а дел од демонстрантите со јајца гаѓаа кон владината зграда, а истото го направија и кон објектот на обвинителството.
Додека беа пред Владата, на микрофон се обратија неколку говорници кои го споделија своето искуство со Клиниката за онкологија.
„Ќе се изборам за сите други, ако не успеав за мајка ми. Народот е тој што може да пресуди. Не дај Боже во оваа држава да се разболиш, нема кој да те лечи. Без разлика на вера или нација, да застанеме сите заедно“, рече една од говорничките.
„Оваа Влада, ова Министерство за здравство, Онкологија… тоа е мафија. На човек кој се бори за живот, на човек на кого секој ден му е битен… јас знам за мојата мајка, секој ден гледав да ѝ го продолжам животот и на крај ќе се најдат некои директори, министри, убијци кои за моќ и сопствени пари ќе го уништат животот на човекот. Не знам како да ви кажам, болката е преголема“,
зборуваше друг од говорниците.
Пред обвинителството демонстрантите продолжија да скандираат „Оставка“, „Нема правда, нема мир“, „Место на злосторот“, а додека на асфалтот пред Владата со црвена боја испишаа „Убијци“, пред обвинителстовото напишаа „Соучесници“.
Додека пред владината зграда можеа да се забележат членови и активисти на Левица, пред обвинителството во првиот ред се појави и партискиот лидер Димитар Апасиев.
Предистрага за случувањата на Клиниката за онкологија беше отворена во петокот. Се вршеа претреси во здравствената установа, како и во два приватни стана во Скопје. Беа одземени документи и компјутери.
За случајот, минатиот месец неделникот „Фокус“ објави серија текстови за постоење разработена криминална бизнис-мрежа за препродавање на скапи лекови – цитостатици. Во мрежата, наводно, биле вклучени повеќе лекари и медицински персонал на Клиниката. Во системот, според пишувањата на неделникот, се внесувале фиктивни пациенти, а на дел од вистинските пациенти им се давала половична терапија и на тој начин скапата биолошка терапија завршувала на црниот пазар.