Средното стручно образование може на компаниите да им помогне полесно да дојдат до потребниот кадар, но и младите полесно да дојдат до вработување. На оваа тема во вечерашната емисија на „360 степени“ дебатираат министерката за образование и наука, Мила Царовска, и генералниот менаџер на „Костал Македонија“, Виктор Мизо.
Средното стручно образование е добра подлога и за оние кои сакаат да се вработат по завршувањето на средно, но и за оние кои сакаат да продолжат на студии и да се усовршуваат во избраната област.
Генералниот менаџер на германската компанија во земјава, „Костал Македонија“, Виктор Мизо вели дека веќе дваесетина средношколци се на пракса во нивната компанија и тоа се кадри кои се потребни на компанијата и со тоа се дава можност тие да добијат вработување веднаш по завршувањето на средното училиште.
„Што е до мене јас би ги задржал и вработил сите, освен оние кои планираат да продолжат на студии на некој од техничките факултети кои се потребни на индустријата во земјава. Дури размислуваме и за некаква стипендија за нив во тој процес“,
вели Мизо.
Според неговите проценки, средношколците кои следната година ќе ја завршат четврта година и се вработат во оваа компанија нивната почетна плата би изнесувала околу 20 илјади денари месечно.
Министерката за образование и наука, Мила Царовска, дополни дека средното стручно образование не ја скратува можноста доколку учениците сакаат да продолжат на факултет, туку напротив им дава подобра стартна позиција во студирањето.
„На пример, во техничките факултети ќе им даде предност во стручните испити бидејќи тие веќе ги поминале во текот на средното образование. Навистина треба да се потрудиме како држава, и Министерството и компаниите, за стручното образование да го презентираме како можност за создавање на инженери, а не само од аспект на работна сила од ниските нивоа“
, вели Царовска.
Министерството за образование го приспособува средното стручно образование на потребите на компаниите од реалниот сектор и сега бројот на дуални паралелки, во кои особено внимание ѝ се придава на практичната настава, е зголемен од 11 на 97. Предизвикот останува во убедувањето на оние што завршуваат основно дека запишувањето во средно стручно е инвестиција во поизвесна иднина, со вработување и пристојна плата за достоинствен живот.