Што подетално значи за организмот и за здравјето на еден млад човек употребата на никотинските кесички или популарно наречени „снус“ и каква е лекарската препорака – разговаравме со професорот Андон Чибишев, клинички токсиколог. Тој смета дека никотинот е особено токсичен за млад организам, а наместо за одвикнување од зависноста од цигари, вака младите стануваат зависници од никотин
360°: Професоре Чибишев, колку Вам, на лекарите на Клиниката за токсикологија, Ви се познати информации за достапноста и содржината на никотинските кесички или популарно наречени „снус“?
Чибишев: „Ние ја пратиме проблематиката посебно во делот на хемикалии кои можат да предизвикаат труење кај човечкиот организам. Можеби не многу, меѓутоа имаме доволно информации, повеќе од медиумите, и достапна литература од која знаеме за каква супстанца се работи, знаеме дека веќе ја има кај нас на пазарот, дистрибуирана е, се продава и знаеме дека различни возрасти на индивидуи ја купуваат и ја користат. Значи, возрасти од 12 години, па нагоре ја купуваат и ја користат.
360°: Какво е влијанието, посебно кај тинејџерите?
Чибишев: Сакам да нагласам дека влијанието на оваа хемикалија, која практично е чист никотин, е многу неповолно баш кај оваа возраст до 18 или 20 години, да кажеме, затоа што употребувана долго време може да влијае на нивниот физички, па и ментален развој. Има многу неповолно дејство на централниот нервен систем, ја смалува можноста за правилно размислување и расудување. Влијае на меморијата, ја намалува способноста за памтење и нормално, заради тоа го пореметува процесот на учење. Тоа се возрасти кога, нели, младите се школуваат, треба да учат и да го научат тоа што им е дадено како материја, да го совладаат. Честопати се жалат на главоболки, вртоглавици, па се изложени заради вртоглавица на одредени несакани повреди, знаете, кога ќе се јави вртоглавица, може да изгубиш рамнотежа, да паднеш и да се повредиш. Се пореметува сонот, не спијат доволно, се пореметува видот, се пореметува апетитот, значи многу последици остава посебно кај младата популација.“
Разговорот со Чибишев погледнете го во видеото: