Во своето последно обраќање од Белата куќа, тој предупреди и за климатските промени и дезинформациите што се шират на социјалните мрежи
Американскиот претседател во заминување Џо Бајден синоќа го одржа својот проштален говор во кој предупреди за „опасна олигархија што се појавува во Америка“. Со своето последно обраќање до јавноста, тој стави крај на повеќедецениската кариера во политиката.
„Денес во Америка се создава олигархија на екстремно богатство, моќ и влијание, што навистина ја загрозува целата наша демократија, нашите основни права и слободи“,
рече Бајден (82), додавајќи дека ултрабогатиот технолошко-индустриски комплекс може да има неконтролирана моќ над Американците.
Во своето последно обраќање од Белата куќа, тој предупреди и за климатските промени и дезинформациите што се шират на социјалните мрежи.
Говорејќи од Овалната соба, Бајден ги пофали достигнувањата на неговата администрација, наведувајќи ги отворањето работни места, трошењето за инфраструктура, здравството, извлекувањето на земјата од пандемијата и правењето на САД побезбедна земја.
Тој, сепак, додаде дека ќе биде потребно време за да се почувствува целосното влијание на сè што направиле заедно, „но семето е засадено, тие ќе растат и ќе цветаат со децении“. Бајден ѝ посака успех на новата администрација на Доналд Трамп, но потоа издаде серија остри предупредувања.
За климатските промени, тој рече дека моќните сили сакаат да го искористат своето неконтролирано влијание за да ги елиминираат чекорите што ги презеле за справување со климатската криза за да им служат на нивните сопствени интереси – се за моќ и профит.
Зборувајќи за дезинформации, Бајден предупреди дека „Американците се преплавени од лавина дезинформации кои овозможуваат злоупотреба на моќта“.
„Вистината е удавена во лаги“
Тој удри и на социјалните мрежи како „Мета“, која неодамна објави дека ќе се ослободи од независните проверувачи на факти.
„Социјалните медиуми се откажуваат од проверката на фактите. Вистината се задушува со лаги кажани за моќ и профит“,
рече Бајден.
Неговиот напад на ултра богатиот „технолошко-индустриски комплекс“ беше прикриена референца на лидерите од Силиконската долина, како што е Илон Маск, најбогатиот човек во светот кој е близок со Трамп и обезбеди голема финансиска поддршка за неговата кампања.
Други технолошки шефови како Џеф Безос и Марк Закерберг вложија напори да ги подобрат односите со Трамп пред неговото враќање во Белата куќа.
„Бидете чувари на пламенот“
Завршувајќи го својот говор, Бајден ги повика Американците да ја чуваат својата земја.
„Сите вие бидете чувари на пламенот“,
им порача.
Неговото проштално обраќање дојде истиот ден кога го објави договорот за прекин на огнот меѓу Израел и Хамас, на кој тој се осврна во воведните зборови.
Бајден рече дека преговорите се едни од најтешките во неговата кариера и ја презеде заслугата што помогна да се затвори договорот.
Според договорот, примирјето ќе стапи на сила на 19 јануари, ден пред Трамп да ја преземе функцијата. Новиот претседател, исто така, ја презеде заслугата за договорот, велејќи дека тоа е можно само затоа што победил на изборите во ноември.