Поранешниот собраниски спикер Трајко Вељаноски тврди дека работел според Деловникот и нема никаква вина за настаните од 27 април 2017 година во парламентот.
Тој денеска даваше одбрана, како еден од обвинетите за терористичко загрозување на уставниот поредок и безбедноста во судскиот процес што се однесува на организацијата на крвавиот четврток, со што судењето влегува во завршница. Одбрана треба да дадат и другите обвинети, по што ќе останат за изведување дополнителни докази, доколку ги има, како и завршни зборови на обвинителството и одбраната.
Тој во одбраната го потенцираше тоа што барал на конститутивната седница пратениците да се откажат од збор за да може да продолжи седницата со точките на дневен ред, за што, како што рече, потврдиле и пратениците што беа повикувани како сведоци. Меѓутоа, неговиот апел никој не го послушал.
Тврдеше дека не знаел оти ќе се избира претседател тој ден, а го потенцираше тоа што добил допис од 31 пратеник за седницата да продолжи наредниот ден, за што потоа се усогласиле и на координација со претставници од партиите.
Но, кога продолжила седницата попладне, СДСМ побарал да се прекине тековната дискусија и да се продолжи седницата со наредната точка – избор на претседател. Тоа, тврди Вељаноски, е спротивно на Деловникот и не може да се прекине започната дискусија по една и да се продолжи со друга точка.
Тука имало процедурални забелешки и Вељаноски го обвини сведокот вработен во собраниски служби дека лажел кога кажал дека му дал предност за збор на Зеќирија Ибраими, кој ја пееше албанската химна, што се смета за еден од моментите што ја разгневи толпата што протестираше.
„Дека било според редослед, се увиде од стенографските белешки и од исказите на сведоците кои го потврдија тоа. Џеват Адеми и Артан Груби укажаа дека пред нив пријавен бил Зекирија Ибраими. Тој пееше 20-ина секунди, јас не ни знаев што се пее“,
рече Вељаноски кој додаде дека немал можност директно да го исклучи микрофонот на Ибраими, туку таква опција е воведена неколку месеци подоцна, во претседалствувањето на Џафери.
Тој потенцираше и дека тогашните пратеници Зоран Заев, Петар Атанасов и Никола Тодоров, во своите сведочења, потврдиле дека го почитувал Деловникот.
„Во 18:01 часот ја прекинав седницата, закажав продолжение за утредента, се качив во кабинетот и се случија тие немили настани за кои најискрено жалам затоа што имаше жртви, едни физички, други беа политички жртви, но сите заедно сме жртви и изгубивме многу од тој настан“,
рече Вељаноски.
Тој се бранеше и дека пораките од комуникацијата со Никола Груевски не се доказ дека се организирале. Едната порака што му ја испратил на Груевски е порака што Вељаноски ја препратил откако ја добил од вработена во прес-службата, која била на пресот на Зоран Заев и го информира по Вељаноски што кажал лидерот на СДСМ, односно дека ќе се избира претседател. Тоа не било случај само дента, тврдеше Вељаноски, туку вработената го информирала и претходно од други прес-конференции.
„Таа порака јас ја препратив, ниту додавав ниту одземав. Тоа што беше во пораката го имаше по сите медиумите, тоа беше најдостапна информација, со оглед дека беше кажана на пресот“,
рече Вељаноски.
Исто и за пораката што тој ја добил од Груевски, рече дека е препратена, но тој не ја сфатил сериозно.
„Околу 16 часот добив порака препратена од Никола Груевски, која тој ја добил од Панче Кралев, дека дента ќе се врши избор на претседател. Јас ја сфатив за несериозна. Прво, зашто имаше голем број пријавени за дискусија, второ, веќе добив допис од 31 пратеник во кој бараат седницата да продолжи седницата за утре. Трето, претходниот ден на 26 април исто така добив порака од Груевски која му ја пратил Чавков дека тој ден ќе се изврши избор”,
рече Вељаноски.
Обвинителката Вилма Русковска немаше ниту едно прашање за обвинетиот Вељаноски.
На наредното рочиште на 31 март одбрана треба да даваат и другите обвинети: ексминистрите Миле Јанакиески и Спиро Ристовски и поранешниот директор на УБК, Владимир Атанасовски.
Во истрагата за овој предмет беа опфатени и бившиот премиер Никола Груевски и ексразузнавачот од УБК Никола Бошкоски, но тие ќе станат обвинети кога ќе бидат достапни за органите на прогонот.