Станува збор за 20 македонски граѓани кои, во меѓувреме, беа во карантин во Свиндон, Велика Британија, соопштија од МНР
Од Лондон преку Цирих, вечерва во 19:30 часот, на Меѓународниот аеродром – Скопје, пристигнуваат 20 наши граѓани кои претходно беа евакуирани од Авганистан, но поради ковид-мерките беа во карантин во Свиндон, Велика Британија.
Како што соопшти МНР, заедно со последните двајца наши државјани, евакуирани од Авганистан, кои се очекува да слетаат исто така вечерва во Скопје, во 1:30 по полноќ, завршува процесот на репатријација на нашите граѓани од Авганистан.
Министерството за надворешни работи почна посебна акција за евакуација на нашите државјани од Кабул, за што беше формирана и посебна работна група во рамки на МНР.
Акцијата за евакуација почна на 15 август, со првата група граѓани кои беа евакуирани за Доха, Катар. После неколку дена, сите граѓани беа евакуирани од Авганистан, а во изминативе две недели, преку Абу Даби, Осло и Лондон, сѐ до денеска, сите наши граѓани се вратени во земјава, се наведува во соопштението од МНР.