Еврокомесарот за соседство и проширување Оливер Вархеји најави нов пристап во пишувањето на извештаите на Европската комисија за државите кандидати за членство. Во пресрет на објавувањето на извештаите за Северна Македонија и за Албанија, најавено за идната недела, Вархеји вели дека документите ќе бидат така срочени што ќе им биде тешко на земјите членки на ЕУ во март да кажат „не“ за отворање преговори со Скопје и со Тирана.
„Сега сме во средина на процесот. Неделава имавме првична дискусија во Советот за општи работи на ЕУ и мислам дека ќе има уште еден состанок во март. Во меѓувреме, соработуваме со сите земји членки и сметам дека притоа многу важен импут ќе биде извештајот на Европската комисија, кој ќе биде објавен наредната недела – така ќе може да дискутираме не само за методологијата туку и за почетокот на пристапни преговори на наредниот состанок на Советот. Мислам дека тоа е планот на хрватското претседателство, а во меѓувреме многу е важно сите да соработуваат едни со други за да разберат што мислиме – дали направениот напредок беше доволен. Сметам дека напредокот треба да се оцени како доволен, но не сакам да ги прејудицирам наодите во извештајот на ЕК, кој ќе го објавиме наредната недела. Исто така, ќе видиме дека репортирањето на ЕК во извештајот ќе биде поинакво, повеќе централноевропско, пореалиситично, но исто така тоа ќе значи дека можеби ќе биде потешко да им се противречи на наодите во извештајот“,
рече Вархеји.
Тој изјавата ја даде во Прага на состанокот на министрите за надворешни работи од Вишеградската група и шефовите на дипломатиите на Западен Балкан.