Еврокомесарот понудил и конкретна помош за за дигитализацијата на судството, како и експертска помош од ЕК онаму каде што е потребно
Потребно е интензивно да се работи на случаите на организиран криминал и висока корупција во наредниот период и да не се дозволи предметите да застаруваат или да не се постапува по случаите, посочил еврокомесарот за пропирување Оливер Вархеји, на попладневната видеосредба со министерот за правда Бојан Маричиќ.
Вархеји понудил и конкретна помош за дигитализацијата на судството, како и експертска помош од Европската комисија онаму каде што е потребно.
Во текот на разговорот, Маричиќ, како што информираа од неговиот кабинет, му ги претставил на еврокомесарот последните реформи што ги спроведуваат Владата и Министерството за правда, во насока на севкупно подобрување на работењето на правосудниот систем.
Вархеји ја поздравил блиската соработка и партнерство со ЕУ во реформите во областа, имајќи предвид дека со почетокот на преговорите за членство во Европската унија особено ќе се интензивира соработката во секторот правда. Вархеји исто така ја потенцирал значајноста на поглавјето 23, кое како дел од кластерот „фундаменти“ ќе биде од постојан интерес за Комисијата и земјите членки.