Министерот за здравство Венко Филипче, најави дека и кај се размислува за вакцинацијата на деца од 12 до 16 години и дека ќе се евалуираат истражувањата за имунизација на оваа категорија
Се повеќе земји даваат зелено светло за имунизацијата на деца од 12 до 16 години со вакцината на „Фајзер“ и „Бионтек“, која меѓу првите ги заврши клиничките испитувања кај оваа возрасна група, а пред неколку дена започна со тестирање на вакцината кај деца под 12-годишна возраст. Додека од една страна Светската здравствена организација (СЗО) порачува дека децата не се приоритет, дел од земјите веќе започнаа или прават планови за вакцинација на оваа возрасна група.
Србија вчера ја одбори вакцината на „Фајзер“ за популацијата од 12 до 16 години. Српската Агенција за лекови вчера соопшти дека нејзините експерти одлуката ја донеле по ригорозно „чешлање“ на документацијата со сите научни податоци од клиничките испитувања кои се спроведени во други земји. Претходно, вакцината беше одобрена и за возрасната група од 16 до 18 години.
Во Европа повеќе земји најавија или веќе започнаа со вакцинацијата на деца. Европската агенција за лекови (ЕМА), која е тело на ЕУ, пред околу две недели и официјално ја одбори употребата на „Фајзер“ за деца над 12 години.
Од земјите во регионот, како што објавија хрватските медиуми, заклучно со 9 јуни во Хрватска вакцинирани се 76 деца на возраст од 12-15 години, а 1 345 од 16-17 години. Меѓутоа, станува збор за деца и тинејџери кои имаат здравствени проблеми и за кои се проценило дека заразата со ковид-19 може сериозно да ја комплицира нивната состојба и би можела да биде опасна и по нивниот живот. Наесен кога ќе почне новата училишна година, како што изјавила заменик-директорката на хрватскиот Институт за јавно здравје, Ивана Павиќ-Шиметин, треба да почне и масовна вакцинација на децата над 12 години.
Италија, само неколку дена по одобрението од ЕМА, најави дека почнува вакцинација со „Фајзер“ на популацијата над 12 години. Сличен е случајот и со Романија.
Владата на Франција соопшти дека од 15 јуни ќе започне со вакцинација на децата и тинејџерите над 12 години со цел да се избегне затворање на училиштата во септември. Вакцината на „Фајзер“ веќе се нуди на деца и во Германија, откако кон крајот на мај одлуката на властите ја соопшти канцеларката Ангела Меркел. И Полска од 7 јуни почна со имунизација на децата од 12 до 15 години. Литванија најави дека од денеска можно е да почне со имунизација на оваа возрасна група, а Естонија најави вакцинација на тинејџерите од есен… И дел од европките земји надвор од ЕУ ја одоборија вакцината за деца, меѓу нив и Велија Британија, Сан Марино…
Првата земја во светот која ја одобри вакцината на „Фајзер“ за деца од 12 до 15 години беше Канада. Меѓу првите беа и САД кои на почетокот на мај дадоа зелено светло.
Во Азија исто така неколку земји одобрија, а дел веќе започнаа со вакцинацијата. Сингапур објави план за имунизација на возрасната група од 12-18 години со „Фајзер“, крајот на мај одобрение за вакцинација на деца дадоа и Јапонија и Филипините.
Кина, пак, вчера ја одобри вакцината на „Синофарм“ за деца од 3 до 17 години.
СЗО, пак, досега неколкупати бараше вакцинацијата на деца да не биде приоритет туку богатите земји да ги споделат вакцините со посиромашните.
Експертот на СЗО за вакцинација д-р Кејт О’Брајан пред неколку дена порача дека децата обично не се изложени на ризик да се разболат сериозно или да починат од ковид-19, туку нивната вакцинација главно има за цел да го запре пренесувањето на вирусот. Меѓутоа, со оглед на исклучително ограниченото глобално снабдување со вакцини, имунизација на деца и адолесценти, според неа, не треба да е приоритет, ниту е потребно да се вакцинираат децата пред да се испратат на училиште ако возрасните кои се во контакт со нив биле имунизирани.
И во земјава се размислува за вакцинација на деца
Министерот за здравство Венко Филипче, веќе најави дека и кај се размислува за вакцинацијата на деца од 12 до 16 години. Тој рече дека ќе се евалуираат истражувањата за вакцинација на оваа категорија и дека во текот на летните месеци ќе се подготвува и посебен протокол за настава со физичко присуство од септември за сите ученици.
„Комисијата за заразни болести и претставници на МОН ќе работат да се направи еден протокол, препорака, вклучувајќи ја и таа за вакцинација, да видиме какви ќе бидат сознанијата за да се вратат учениците со физичко присуство од 1 септември“,
изјави Филипче на 28 мај.