Повеќето лидери, на видеоконференцијата иницирана од ЕУ, инсистираа дека вакцината треба да биде достапна за најранливите граѓани и за најзагрозените земји во светот
Донаторската конференција организирана од Европската унија за борба против коронавирусот почна попладнево, а бројни земји ширум светот најавија милиони финансиска поддршка за наоѓање третман и вакцина, јави МИА од Брисел.
Отворајќи ја конференцијата, претседателката на Европската комисија, Урсула фон дер Лајен, најави дека оваа институција ќе придонесе со една милијарда евра за борба против новиот коронавирус.
Првична цел на оваа донаторска конференција е да се постигне сума од 7,5 милијарди евра. Шефовите на држави и влади на земјите во светот се јавија преку видеоврска да објават со колкав износ планираат да учествуваат во глобалниот напор за наоѓање третман и вакцина против ковид-19.
Францускиот претседател Емануел Макрон најави придонес од 1,2 милијарди евра и порача дека вакцината, кога ќе биде развиена, мора да биде јавно добро.
„Легитимно е земјите да го штитат своето население, но ова можеме да го надминеме само заедно, преку соработка во ЕУ, меѓу државите, со вертикалните организации и докажани чинители од фармацевтската индустрија. Оваа вакцина кога ќе биде достапна ќе биде светско јавно добро, таа нема никому да припаѓа, а тие што ќе ја измислат се разбира ќе бидат наградени“,
рече Макрон.
Повеќето лидери кои се обратија на донаторската конференција инсистираа дека вакцината треба да биде достапна за најранливите граѓани и за најзагрозените земји во светот, посебно на африканскиот континент.
За шпанскиот премиер Педро Санчез е клучно оваа борба да се темели врз социјална правда, наука, соработка меѓу земјите и да се намалат нееднаквостите.
„Мораме од ова да излеземе без никого да оставиме зад нас .Мораме да создадеме трајни структури кои ќе овозможат справување со идни инфекции. Оваа криза обелодени нешто важно: не само што сме ранливи како луѓе, туку сме поранливи кога сме необединети“,
истакна Санчез.
Европската унија ќе соработува со Светската здравствена организација и другите релевантни здравствени организации, како на пример Коалицијата за иновативна подготвеност за болести.
Африка исто така ќе биде врвен приоритет во справувањето со вирусот, порачаа лидерите.
„Донаторскиот маратон“, како што го нарекува ЕК, треба да вроди со вакцина која ќе може да се дистрибуира во секој дел од светот за достапна цена. Со ова ЕУ се позиционира уште еднаш како сила која верува пред сѐ во мултилатерален пристап пред предизвиците.
На апелот на ЕУ одговорија речиси сите големи земји низ светот, и бројни помали, со исклучок на САД и Русија.
Од Западниот Балкан учествуваше само Србија. Премиерката Ана Брнабиќ се заблагодари за помошта што нејзината земја ја доби од ЕУ и најави дека Србија ќе придонесе со два милиони евра во оваа иницијатива, од кои еден милион за развој на вакцина и еден милион за СЗО, односно за зајакнување на здравствените системи ширум светот.