Преку протест пред Владата, увозниците на половни моторни возила бараат повлекување на новата уредба за оданочување на увезените возила и враќање на старото законско решение. Бараат да се намали сумата за царина или CО2 данок бидејќи, според нив, давачките се тројно покачени кај одредени возила. Бараат да се намали акцизата за постарите возила со еуро 5 и еуро 6 стандард и да се укине CО2 данокот за нив. Оттаму сметаат дека нема да поевтинат ниту новите возила на сметка на употребуваните, односно дека ќе поевтинат само оние што чинат над 31.000 евра и електричните. Доколку овие нивни барања не бидат исполнети, се заканија дека секојдневно ќе протестираат и ќе ги блокираат градските улици.
„Ние не можеме да увезуваме возила по овие цени затоа што царините излегуваат колку што го купувате возилото во Италија. Во Италија може да има возило во вредност од 3.000 евра, таму имаат плата од 2.000 евра, а кај нас имате давачки од 3.000 евра и возилото станува 6.000 евра. Сите увозници стопираа, веќе не увезуваат. Ако се земе процент од ланската година, може да кажеме дека за овие 15 дена увозот е намелен за 90 отсто“,
велат од Националното здружение на граѓани увозници на половни автомобили „Регулатив“.
Меѓутоа, одговорот што пристигна од Царинската управа е дека не размислуваат за повлекување на оваа законска одредба и се со став дека сè уште е рано да се проценат ефектите од законот.
„Главната поента на овој закон, на оваа уредба, е еколошката компонента. Секако, ги разгледуваме забелешките, се прават анализи. Сепак, треба да бидеме свесни дека нема ни еден месец откако е донесена уредбата за да се увидат првите резултати за да видиме дали треба или не да се интервенира“,
изјави Ѓоко Танасоски, директор на Царинската управа.
Новиот данокот за моторни возила, кој се пресметува врз база на емисијата на јаглерод диоксид, влезе во примена на почетокот на годината. Според властите, оваа уредба е една од мерките за борба против загадувањето и замена на стариот со понов возен парк во државата.