Врз нив, како што велат од ЦУК, од рани зори се дејствува од копно и од воздух со сите домашни воздухоплови и оние кои на помош ги испратија странските земји
Вкупно 24 пожари на отворено имало во последното деноноќие, од кои утринава 13 се активни, информира Центарот за управување со кризи (ЦУК). Врз нив, како што велат од ЦУК, од рани зори се дејствува од копно и од воздух со сите домашни воздухоплови и оние кои на помош ги испратија странските земји.
Сè уште е активен пожарот кај село Калањево во Неготинско каде што горат нискостеблеста шума и грмушки. Нискостеблеста шума гори и кај село Штурово во Општина Радовиш, како и кај селата Сирково и Подлест во Росоман. Кај селата Горни и Долни Липовик во Општина Конче, исто така, опожарена е нискостеблеста шума.
Од утринава активен е и пожарот во Гевгелиско, помеѓу селата Негорци и Кованец, каде што е опожарена мешана шума. Мешана шума и ниска вегетација е зафатена и во пожарот кај село Габровник, префрлен од пожарот од село Слепче, во Општина Чашка. Во Слепче и во село Гостиражни, пак, гори ниска вегетација и дабова шума.
Во рамки на Општина Чашка од утринава активен е уште еден пожар кај селата Јаболчишта и Дреново – зафатена е високостеблеста вегетација. Пожар има и меѓу штипските села Драгоево и Селце кај местото викано Хаџи Реџепи, каде што горат нниска вегетација и грмушки.
Активни пожари утринава има и во општините Студеничани и Зелениково – кај местото викано Бегово Поле и во село Вражале. Зафатени се ниска вегетација и шума.
Во Општина Делчево сè уште гори градска депонија.