Утре не очекувам да се случи ништо спектакуларно, ДУИ и СДСМ уште на усвојувањето на дневниот ред ќе видат дека го немаат потребното мнозинство за уставните измени и затоа по утрешниот ден, сметам дека единствено легитимно од политички аспект ќе биде излегување на предвремени парламентарни избори, вели претседателот на ВМРО-ДПМНЕ, Христијан Мицкоски во гостување на ТВ Сител
Мицкоски вели дека утре во Собранието нема да ги има препознатливите транспаренти и маици кои пратениците на ВМРО-ДПМНЕ ги носеа кога во законодавниот дом лани беше прифатен францускиот предлог, туку дека само еден од пратениците ќе се обрати, по што ќе биде јасно дека уставни измени нема да има. Тој вели дека жали што актуелната Влада била затворена во едноумие и не комуницирала со опозицијата.
„Не можат да го испорачаат тоа што го ветија, а тоа што го прифатија никој нормален не би го прифатил, но тие го прифатија за да останат ден повеќе на власт. По завршувањето ќе продолжат со своеглав инает наместо да излеземе на избори”,
рече Мицкоски.
Според претседателот на ВМРО-ДПМНЕ, грешката е направена уште кога дел од меѓународната заедница влегла во договор со губитничка Влада. Македонската Влада, вели тој, во тој момент била подготвена да вети се само за да остане на власт, па дури и да потпише се, како што и направиле, а сега не можат да испорачаат.
„Преземаа обврски од името на Собранието без притоа да водат сметка дека немаат мнозинство кое е подготвено да го испорача, а немаат такво мнозинство бидејќи во тие моменти не разговараа со најголемата политичка партија – ВМРО-ДПМНЕ”,
кажа Мицкоски.
Прашан што би направило ВМРО-ДПМНЕ за решавање на ситуацијата од позиција на власт, Мицкоски рече дека ќе бара гаранции од Европската унија со кои јасно ќе се потврди македонскиот многувековен идентитет, култура обичаи и јазик, иако како што кажа сега ни претстои историски интервенционизам поради тоа што Бујар Османи потпишал билатералниот договор да биде дел од преговарачката рамка.
Дополнително, од Бугарија и од ЕУ би побарал реципроцитет во однос на малциските права, односно да се почитуваат пресудите на Судот во Стразбур и 14 пресуди во корист на македонската заедница во Бугарија.
„Ако вие барате од мене нешто треба да сте подготвени и да дадете нешто. Барем некои од оние пресуди во Стразбур ако не може да ги имплементирате како тогаш да верувам дека имате добра намера. Од каде потекна идејата за оние 762 кои се декларирале дека користат бугарски јазик, ако е суштината дека мотивот за тоа е некаква дискриминација и слично тогаш видете што се случува во реалноста, 14 пресуди за македонската заедница и 0 за бугарската заедница. Ние бараме она кое легални европски институции”,
изјави Мицкоски.