Премиерот Мицкоски, прашан дали сите оние што ќе конкурираат за вработување во јавниот сектор ќе треба да приложуваат некакви документи со кои ќе ја изразат својата етничка застапеност, рече дека во законот е предвидено тоа да биде со документ за идентификација
Тој најави и дека во законот се предвидени многу работи, како и механизми на санкционирање ако тој не се почитува, но рече дека сè ќе биде појасно откако ќе стигне одговорот од Венецијанската комисија
Владата го усвои предлог-законот за соодветна и правична застапеност, информира денеска премиерот Христијан Мицкоски на прес-конференција по одржаната седница.
Според Мицкоски, предлог-законот има јасна цел, администрацијата да биде вистински сервис за сите граѓани, изградена врз заслуги, знаење, професионалност и интегритет, согласно Уставот и Охридскиот рамковен договор.
Тој вели дека со законот се отвора ново поглавје на професионализам во јавниот сектор, како на државно така и на локално ниво. Како што појасни Мицкоски, предлог-законот ќе биде доставен до Венецијанската комисија, а потоа ќе влезе во собраниска процедура.
„Имаме обврска после толку години да раскрстиме со минатото градејќи институции кои не ги поддржуваат послушните, туку ги вреднуваат способните. Јавен сектор каде што млад човек со интегритет може да напредува. Овој предлог-закон го доставуваме на разгледување до Венецијанската комисија затоа што сакаме највисоки стандарди и целосна усогласеност со европските вредности. Законот ќе биде доставен до Собранието, откако ќе го добиеме мислењето на Венецијанската комисија“,
рече Мицкоски.
Законот, рече Мицкоски, е гаранција дека етничките заедници ќе бидат соодветно и правично застапени, но истовремено во таков процес тој ќе ги штити квалитетите на сите етнички заедници.
На прес-конференцијата со Мицкоски беше и првиот заменик-претседател на Владата, Изет Меџити, кој рече дека овој предлог-закон претставува историски момент.
„Овој предлог-закон претставува историски момент бидејќи за прв пат правичната и соодветна застапеност како уставна категорија од 2001 година добива јасна цел односно законско решение. Предлог-законот гарантира еднаква пристапност во вработување и унапредување во јавната администрација, правична и соодветна застапеност на сите заедници во јавните институции, но и обезбедување вработувањето и унапредувањето да се вршат врз основа на заслуги и квалификации на секој поединец“,
рече Меџити.
Премиерот Мицкоски, прашан дали сите оние што ќе конкурираат за вработување во јавниот сектор ќе треба да приложуваат некакви документи со кои ќе ја изразат својата етничка застапеност, рече дека во законот е предвидено тоа да биде со документ за идентификација.
„Логично е дека оној што ќе аплицира ќе мора да покаже и докаже кој е. Во законот е предвидено тоа да биде со лична карта или со друг документ кој согласно закон го идентификува лицето“,
одговори Мицкоски.
Во однос на тоа дали во законот има некакви проценти за застапеност на одредена етничка заедница во јавниот сектор и дали за тоа ќе биде земен предвид пописот со резидентно или со нерезидентно население, Мицкоски рече дека што се однесува до методологијата таа ќе биде дополнително изработена.
„Што се однесува до методологијата таа ќе биде дополнително изработена откако ќе биде формирано координативното тело кое ќе го координира еден од потпретседателите на Влада, а во него ќе членуваат и членови на Влада кое ќе има за цел да практично наѕира во имплементирањето на законот, но истовремено заедно со Агенцијата за вработување ќе дефинираат методологија и ќе се држиме до неа и на централно и на локално ниво. Има уште процеси што ќе дојдат до таа методологија“,
рече Мицкоски.
Мицкоски најави дека јавна дебата за предлог-законот ќе има откако ќе се добие мислење од Венецијанската комисија и додаде дека во собраниска процедура ќе има можност да се поднесат амандмани.
Тој најави и дека во законот се предвидени многу работи, како и механизми на санкционирање ако тој не се почитува, но рече дека се ќе биде појасно откако ќе стигне одговорот од Венецијанската комисија.
Прашан за реакциите на ДУИ кои беа уште пред предлог-законот да се донесе на владина седница, Мицкоски рече дека целта не била да зборуваат за суштината туку „за се да бидеме против и етнички да ги поларизираме работите“.
„На слепо, не треба ништо да видат само да се поларизираат работите. Апсолутно можам да кажам дека за разлика од нив кои во минатото носеа вештачки импланти, кои понижуваа и видовте колку долго време на траење имаат, овој предлог-закон го работевме да биде согласно Уставот и токму една од причините зошто го испраќаме до Венецијанската комисија е токму тоа – за да немаме утре повторно проблеми вака било, така било и да креираме политички теми“,
кажа Мицкоски.
Според него, ДУИ е политичката партија која во рамки на претходната влада во извештај вели дека „балансерот“ како алатка е исцрпена и дека треба да се избрише.
„И сега истите тие се против самите ДУИ. Кога е ДУИ опозиција, е против ДУИ кога е во Владата. Малку е несериозно да се испраќаат такви пораки“,
додаде премиерот.