Уставниот суд со времена мерка: Службите не смеат од граѓаните да бараат податоци за националност за изводите за родени, венчани и умрени лица

Според Судот, посочува портпаролката на Уставниот суд, Беловска, припадноста кон одредена нација е приватно и внатрешно чувство на секој поединец и е негово право да одлучи дали ќе биде припадник на одредена нација, дали ќе се изјасни за сопствената националност, но и да се повика на правото да не се изјаснува по ова

Од денеска, па сè додека Уставниот суд не ја донесе конечната одлука, службите не смеат од граѓаните да бараат податоци за впишување на националност во изводите за родени, венчани и умрени лица, со оглед на тоа дека е донесена т.н. времена мерка, рече портпаролката на Уставниот суд, Христина Беловска.

„Уставниот суд одлучи да поведе постапка по делови од три члена од Законот за матична евиденција во кој е содржан зборот националност, во изводите за родени, за венчани и за умрени лица. Судот денеска изрази сомнеж во уставноста во членот 4 став 1 точка 2 во делот националност, членот 11 став 1 точка 1 во делот националност и во членот 13 став 1 точка 1, во делот националност. Во следниот период Уставниот суд ќе оценува дали е уставно покрај наведени лични податоци како што се името, презимето, податоците за раѓање и живеалиште граѓаните да ја наведуваат и својата националност во матичните книги за родените, за венчаните и за умрените лица“,
изјави Беловска.

Според Судот, посочува таа, припадноста кон одредена нација е приватно и внатрешно чувство на секој поединец и е негово право да одлучи дали ќе биде припадник на одредена нација, дали ќе се изјасни за сопствената националност, но и да се повика на правото да не се изјаснува по ова.

Токму поради тоа е поведена постапката.

„Уставниот суд смета дека овие оспорени одредби не се во согласност со неколку членови на од Уставот односно владеењето на правото опфатени во членот 8 Алинеја 3, во членот 18 кој ја гарантира тајноста на личните податоци. Од денеска па се додека судот не ја донесе конечната одлука не смеат од граѓаните да се бараат вакви податоци за впишување на националност во изводите за родени, венчани и умрени лица, со оглед на тоа дека е донесена т.н. времена мерка“,
рече Беловска.

Иницијативата е поднесена на 3 јуни 2023 година од партијата Левица.