Истече и мандатот на судијата Јован Јосифовски, откако во последните седум месеци оваа институција функционираше без една третина од членовите, чекајќи Собранието да утврди предлози и да избере нови уставни судии
Јован Јосифовски ги троши последните денови како уставен судија, по девет години стаж во судот кој, според Уставот, брои девет члена, а во наредниот период ќе функционира само со петмина, чекајќи Собранието да избере нови судии. Тој денеска последен пат присуствувал на седница на Уставниот суд, пред и формално да му истече мандатот на 14 јануари.
Уставниот суд речиси седум месеци работи без една третина од членовите откако на крајот на мај годинава им истече мандатот на тогашниот претседател на судот Сали Мурати и на двајцата неговите претходници Елена Гошева, која беше на чело на Уставниот суд од 2013 до 2016 година и на нејзиниот наследник Никола Ивановски, кој беше претседател до 2019 година.
Јосифовски беше избран за уставен судија на 24 декември 2012 година, но од Уставниот суд велат дека мандатот му завршува кон средината на јануари, кога ја преземал должноста.
Пред седум месеци на чело на Уставниот суд дојде последната новоизбрана судијка Добрила Кацарска, но во целиот овој период Собранието не успеа да избере уште три нови уставни судии поради блокадите што се создадоа во собраниската Комисија за избори и именувања, која до скоро ја предводеше Костадин Костадинов од СДСМ, кој сега е градоначалник на Струмица.
По локалните избори, сѐ уште не е назначен нов претседател на надлежната собраниска комисија, која треба да достави до предлози до Собранието за нови уставни судии.
Претседателот на парламентот Талат Џафери изјави денеска дека Комисијата за избори и именувања е таа што треба да ги утврди предлозите за кои на крајот одлучува Собранието со апсолутно мнозинство, додека за судиите од редот на помалите етнички заедници е потребно и Бадентерово мнозинство.
Тоа што Комисијата нема претседател не е пречка да заседава, со оглед на тоа што има заменик-претседател, како што и сите членови имаат свои заменици. По тој принцип помина и комисиската расправа за буџетот за следната година, иако и доскорешниот претседател на Комисијата за финансирање и буџет, Тимчо Муцунски, на локалните избори беше избран за градоначалник на аеродром.
Иако со петмина судии Уставниот суд сѐ уште може да носи одлуки, прашање е дали во секое време ќе може да обезбеди кворум за работа и дали сите преостанати членови секогаш ќе гласаат „усогласено“.
Во последните комбинаторики, како можен нов член на Уставниот суд, се споменуваше државниот јавен обвинител Љубомир Јовски, кој самиот изјави дека би прифатил таков трансфер.