Цементарницата УСЈЕ, пред која денеска група граѓани протестираа изразувајќи револт поради загадувањето, истакнува дека работи согласно највисоките стандарди и како паушални ги оцени тврдењата на граѓанските организации.
„Цементарницата УСЈЕ е отворена компанија и, како и досега, и денес ги отворивме вратите и ги поканивме граѓаните кои дојдоа да протестираат да нѐ посетат, да ги постават сите прашања и да се уверат на самото место дека работиме по највисоките стандарди. За жал, оваа покана беше одбиена од нивна страна. Потенцираме дека УСЈЕ работи согласно највисоките стандарди и нашата работа нема никаква корелација со состојбите со амбиенталниот воздух во Скопје. Овие наши тврдења можат да се проверат во кое било време, а сите податоци се јавно достапни“, се вели во соопштението од компанијата.
За УСЈЕ тврдењата на дел од граѓанските и невладини организации се неодговорни и ја доведуваат во заблуда јавноста.
„Ваквите неосновани тврдења создаваат целосно погрешна слика за нашата компанија, а истовремено создаваат и негативна слика за граѓанскиот сектор. Убедени сме дека постои желба за искрена намери за подобрување на состојбите во животната средина, ние ги поддржуваме сите такви заложби и самоиницијативно преземаме низа активности во таа насока. За да се подобрат состојбите во животната средина мора сите заложби да се засноваат на факти, а не на перцепција и целосно неосновани тврдења“,
нагласуваат од „УСЈЕ“.
Иницијативата „Движење за чист воздух“ денеска одржа протест пред Цементарницата „УСЈЕ“ затоа што што според нив, треба заеднички да се покаже револтот против загадувањето. Бараат од Владата забрана за увоз на каков било вид отпад сè додека не се формираат функционални контролни механизми и не се усвојат директивите кои ги регулираат сите типови на индустрии. Се бара и инклузивност на граѓанските здруженија во контролните тела и нивно вклучување во секој инспекциски надзор, како и акредитирање на лабораториите на МЖС и Хемискиот факултет.
Од УСЈЕ сметаат дека нивната компанија е погрешна локација за протестите, бидејќи искажаните обвинувања не придонесуваат за подобрување на состојбите со амбиенталниот воздух во Скопје, туку погрешна слика за компанијата и негативна слика за граѓанскиот сектор.
Во прилог на соопштението од УСЈЕ испратија и листа на факти кои според нив докажуваат дека компанијата не е причинител за зголеменото аерозагадување, дека користи безбедно алтернативно гориво кое не загадува, дека се дел од решението за почиста животна средина и дека се партнер на невладиниот сектор во грижата за животна средина.
Во листата е наведено следново:
– УСЈЕ има 24 часовен мониторинг – единствена компанија во државата која ги објавува мерењата на емисиите на својата интернет-страница;
– Единствена компанија во државата која податоците од мерењата редовно им ги доставува на медиумите, на невладините организации и на граѓанските здруженија;
– Емисиите се постојано под граничните вредности, а во делови неколкукратно пониски од нив (просечно на годишно ниво емисиите на сулфурни оксиди се 15 до 39 пати пониски, а емисиите на вкупна прашина за 5 до 6,5 пати пониски од граничните);
– Во кругот на цементарница УСЈЕ е поставена дополнителна мерна станица за амбиентален воздух на позиција определена од надлежните институции;
– Податоците од оваа мерна станица редовно покажуваат дека нема корелација помеѓу работењето на печките на УСЈЕ и квалитетот на амбиенталниот воздух на мерните станици во нашиот град – загадувањето на воздухот во градот е највисоко во зимските месеци и во периодите кога печките на УСЈЕ не работат поради годишни ремонти; обратно, тоа е најниско во летните месеци кога УСЈЕ работи со целиот свој капацитет;
– Единствена компанија која самоиницијативно ангажира акредитирани лаборатории за повремено контролно споредбено мерење на квалитетот на амбиенталниот воздух во кругот на компанијата и на различни точки во нашиот град. (Последното такво испитување, направено од акредитирана лабораторија на 10.-11. јануари 2020 година, период кога не работеше ниту една печка на Цементарница УСЈЕ, покажа високи вредности на загаденост на воздухот на сите испитани точки во градот, вклучително и во кругот на УСЈЕ);
– Единствена компанија која инвестира во технологии кои ги намалуваат емисиите пред тоа од неа да го бара домашната легислатива (технологии за значајно намалување на емисиите на азотни оксиди и прашина, третман и прочистување на атмосферски отпадни води, …);
– Во Цементарница УСЈЕ производниот процес автоматски запира доколку не се вклучени филтрите;
– Единствен капацитет во државата со високоефикасен комплексен систем на вреќесто филтрирање, каде во еден филтер има по најмалку 3000 вреќи кои ја запираат прашината и други емисии и ги враќаат во производниот процес, како составен дел од финалниот производ;
– Технолошки е невозможно печките да работат ноќе, а да се гасат дење – континуиран процес;
– Производствен процес при кој енергенсот согорува на температури над 1500 C°, а температурата на гасови е 2000 C°, на кои, според хемиска закономерност, нема опасни емисиони остатоци;
-Засега единствена компанија која инвестирала во технологија која може како гориво безопасно да користи оризова арпа, ткаенинини и друго, кои инаку се спалуваат по полињата во државата или непрописно се депонираат;
– Единствена компанија која инвестирајќи има создадено услови и можности за идна безопасна и безостаточна употреба на домашно алтернативно гориво произведено од претходно селектирани и преработени фракции од домашен комунален отпад (RDF);
– Чекајќи домашен РДФ, компанијата користи безбедно алтернативно гориво од увоз од докажано кредибилен и сигурен производител од Италија. (Алтернативните горива во цементната индустрија во Европа се користат од 50-тите години на минатиот век, а во 2017-тата генералниот просек во земјите на ЕУ достигнал 41% замена на конвенционалните енергенси).