На датумите во декември, кои ги споменува Арсовска, во фабриката воопшто не се правени мерења, велат од компанијата. Мерењата на 3 и 4 јануари, пак, тврдат дека покажале оти нема корелација помеѓу работата на цементарницата и квалитетот на воздухот во градот, а концентрацијата на ПМ 10 честичките измерени во фабриката биле дури и помали од други мерни места во градот
Скопската цементарница „Титан – Усје“ ја демантира градоначалничката Данела Арсовска велејќи дека во јавноста изнела неосновани ставови откако најави дека ќе поднесе кривична пријава против компанијата поради загадување.
„Производниот процес во Цементарница ‘Усје’ се одвива во законски определените рамки и според еколошките стандарди“,
велат од цементарницата.
Арсовска на вонредна прес-конференција попладнево рече дека при вонредни контроли на 26 и 27 декември лани и 3 и 4 јануари годинава биле измерени трипати повеќе ПМ 10 честички кои се испуштаат во воздухот.
Од компанијата, пак, велат дека тоа не е точно. Месецов не биле измерени повеќе од дозволените емисии, а во декември воопшто не биле правени мерења.
„Имено, вонредната контрола од страна на Државниот инспекторат за животна средина, спроведена на 3 и 4 јануари 2023 година, во присуство и на инспектори од Град Скопје, потврди дека емисиите од производниот процес во цементарница ’Усје‘ се пониски од дозволените гранични вредности. На прес-конференцијата беа изнесени и податоци за мерења на 26 и 27 декември 2022 година. Вакви мерења во овие денови во кругот на фабриката воопшто не се направени, па оттука резултатите од нив не можат да се поврзат со ‘Усје’“,
велат од „Титан – Усје“.
Мерењата на 3 и 4 јануари, додаваат од компанијата, покажале дека нема корелација помеѓу работата на цементарницата и квалитетот на воздухот во градот бидејќи резултатите од сите емисии точки во производствениот процес покажале оти границите не се надминати, а концентрацијата на ПМ 10 честичките измерени во фабриката биле дури и помали од други мерни места во градот.
Арсовска претходно изнесе и дополнителни информации дека од котларницата за загревање на цементарницата биле надминати вредностите на азотни оксиди – границата е 350, а таа тврдеше дека се измерени 711 милиграми на кубен метар, при што ја обвини компанијата дека не ја почитува издадената интегрирана еколошка дозвола.
Од цементарницата, пак, велат дека поради кризата за загревање на просториите користеле мазут и тоа не е прекршување бидејќи овој енергенс е дозволен согласно А-интегрираната еколошка дозвола што ја поседуваат. Но, наведуваат дека биле регистрирани отстапувања кај еден од параметрите.
„Поради енергетската криза и нарушеното снабдување со природен гас, за загревање на просториите се употребува мазут што е дозволен енергенс согласно А-интегрираната еколошка дозвола. При оваа вонредна контрола, кај парниот котел, кој не е дел од производниот процес и е исклучиво наменет за загревање на просториите, беше регистрирано отстапување кај еден параметар од мерењата. Компанијата веднаш ќе ги имплементира препораките на инспекторатот и ќе направи замена на енергенсот со природен гас“,
велат од „Титан-Усје“ во писмената изјава.
Во врска со мерењата, вчера преку соопштение се огласи Државниот инспекторат за животна средина, кој заедно со инспекторите од Град Скопје ги правеа контролите во компанијата. Оттаму вчера не наведоа дека се измерени повеќе ПМ 10 честички, но констатирале надминување на границите кај азотните оксиди. Спротивно на најавата од градоначалничката на Скопје, посочија дека е почната постапка за спогодување со „Титан – Усје“, па доколку не се спогодат, ќе има судска постапка.
„Согласно извршените мерења на концентрации на загадувачки супстанции, цврсти честички и прашина од емитер Подготовка печки бр. 3 и 4 (енергенс петрол кокс) како и загадувачки супстанции и чаднокатрански број од котел од Котларница за загревање на простории (енергенс мазут), е утврдено дека кај производните Печки бр. 3 и 4 нема надминување на ГВЕ (граничните вредности на емисија)“;
„Кај котелот од котларницата за загревање на просториите утврдено е дека има надминување на ГВЕ за параметарот азотни оксиди NOx и од дозволената ГВЕ-350 резултатот е 711,9 милиграми/метар кубен“;
„Поради утврден прекршок од III категорија, согласно член 212-ж став (1) точка 3 од Законот за животната средина, започната е постапка за спогодување за која правниот субјект треба да се изјасни во законски предвидениот рок и доколку се согласи постапката ќе ја води Комисијата за спогодување при МЖСПП, во спротивно ќе се води судска постапка. За сторениот прекршок, глобата за големи трговци изнесува180.000-200.000 евра во денарска противвредност“,
гласеше вчерашната објава од Државниот инспекторат.