Пописот трае до четврток, а попишувачите работат интензивно на терен, од 8 до 20 часот. Граѓаните кои досега не биле попишани може да очекуваат дека следните денови ќе бидат попишани, а некои ќе бидат опфатени последните три дена од пописот. За оние кои не успеале да остварат со контакт со попишувачите поради обврски, од денеска се отворени пунктови во повеќе населби
Заклучно со вчера попишани се вкупно 1 395 000 граѓани, над 435 000 домаќинства и над 600 000 станови, а се самопопишани 195 477 граѓани од дијаспората.
Државниот завод за статистика (ДЗС) од денеска, со цел никој да не биде пропуштен во пописот, ќе им овозможи на граѓаните да можат да отидат на одредни локации во нивните општини и да ја завршат својата граѓанска и законска должност.
Јасмина Ѓоргиева од ДЗС на прес – конференција појасни дека ваквите пунктови се за граѓаните кои поради некоја причина не успеале во изминатите 20 дена да остварат контакт со попишувачот, односно попишувачот поминал во нивиниот пописен круг, но не ги нашол во моментот дома, оставил или не оставил порака, едноставно не бил воспоставен контакт, од денеска ќе можат на одредни локации во нивните општини и да ја завршат својата граѓанска и законска должност.
„Тие граѓани ќе можат да појдат на овие локации во нивните општини и да се попишат. Овие локации, за секоја општина во државата, ќе бидат објавени на веб-страницата https://popis2021.stat.gov.mk/“,
појасни Ѓоргиева.
Ова е последната фаза од пописните активности на терен, кога се привршуваат сите активности што се спроведуваа последните 20 дена, кога попишувачите и нивните реонски инструктори ги посетуват сите пописни кругови, ги проверуват и се обидуваат да откријат дали некој е пропуштен.
Портпаролот на Владата Муамет Хоџа на вчерашната прес-конференција апелираше до останатите во земјава и до сите во дијаспората кои досега не се попишани да го сторат тоа.
Пописот трае до четврток, а попишувачите работат интензивно на терен, од 8 до 20 часот. Граѓаните кои досега не биле попишани може да очекуваат дека следните денови ќе бидат попишани, а некои ќе бидат опфатени последните три дена од пописот.
Министерот за правда Бојан Маричиќ пак оцени дека до крајот на следната недела успешно ќе финишира попишувањето на населението. Според него, добро е што апелите за бојкот не наидоа на поддршка кај граѓаните, кои се свесни за значењето на оваа голема статистичка операција.
„Потоа неколку месеци за сумирање на резултатите. Овој попис се прави по методологија на Евростат, подготвуван е многу долго и се спроведува по 20 години. Ова е натпартиска операција и навистина жалам што некои помали политички партии место да го поддржат, решија да собираат политички поени на пописот, но на крајот убеден дека сите ќе бидеме задоволни од тоа како го изведовме пописот“,
рече Маричиќ.
Пописот на населението, домаќинствата и становите кој официјално започна на 5 септември ќе трае до 30 септември.