Тимовите, кои, како што велат од Здравство, се со големо искуство, во моментов вршат евалуација на просторните услови и апаратурата во неколку центри за рехабилитација на пациенти со изгореници
Денеска во земјава се враќа уште еден пациент кој, како и голем број други по трагедијата во Кочани, беше пренесен и доби лекарски третман во здравствена установа надвор од државата.
Конкретно, како што соопшти Министерството за здравство, станува збор за пациент кој бил хоспитализиран во медицински центар во Австрија и тој согласно протоколите ќе биде задржан на една од клиниките, каде што ќе биде под 24-часовен надзор.
Според Министерството, во моментов во болници во странство се наоѓаат 80 повредени, од кои двајца се третираат амбулантски и засега нема промена во нивната здравствена состојба во споредба со претходните денови.
„Изминатото деноноќие на Клиниката за пластична хирургија е примен пациент кој е вратен од Грција и по неопходните испитувања ќе биде пуштен на домашно лекување. Во моментов на оваа Клиника се хоспитализирани тројца пациенти“,
велат од Здравство.
Дополнително, оттаму додават дека во изминатите 24 часа нема згрижени пациенти од повредените во Кочани на Клиниката за токсикологија.
Во однос на здравствените установи каде што се наоѓаат на лекување повредени во пожарот, според Министерството за здравство, во Градската општа болница (ГОБ) „8 Септември“ се хоспитализирани тројца пациенти, а во Хируршката клиника „Св. Наум Охридски“, остануваат шест пациенти кои се хоспитализирани на одделение.
На Клиниката за пулмологија и понатаму хоспитализирани остануваат двајца пациенти, а непроменета е и состојбата со бројот на повредени кои се лекуваат во приватните здравствени установи. Како што информираа вчера од Министерството за здравство, во „Систина“ се лекуваат тројца пациенти.
Инаку, од Министерството денеска информираа и дека во земјава се пристигнати тимови од странство кои треба да помогнат во процесот на рехабилитација на пациентите со изгореници.
Тимовите, кои, како што велат од Здравство, се со големо искуство во третирањето ваков вид повредени, во моментов вршат евалуација на просторните услови и апаратурата во неколку центри за рехабилитација на пациенти со изгореници.
Од Министерството за здравство велат дека остануваат во постојана комуникација со медицинските тимови во земјата и во странство за обезбедување најдобра можна нега за секој пациент од повредените од трагедијата во Кочани.