Ограничувањата не се однесуваат на грчки државјани, лица што имаат дозвола за престој и лица што живеат во Грција, лица со неопходни професионални или медицински причини, транзит на болнички возила за персоналот на земјите – членки на ЕУ и ЕУЛЕКС на Косово…
Границите на Грција за државјани на трети земји, како и привремените ограничувања на копнените граници со Северна Македонија, Албанија и Турција, остануваат затворени до 15 септември.
Станува збор за двете министерски одлуки, кои во текот на летото се продолжуваа на секои две седмици.
Ограничувањата, како што се наведува во првата одлука, „се од превентивни причини за заштита на јавното здравје од дополнително ширење на коронавирусот на грчка територија“ и се однесуваат патните и железничките поврзувања на Грција со Северна Македонија, Албанија и на Турција.
За туристите и странските државјани за кои не постои забрана, дозволен е влез само преку Бугарија, односно преку граничниот премин Промахонас (Кулата) и само со негативен тест за ковид-19 направен 72 часа пред пристигнувањето.
На останатите гранични премини што се отворени – Какавија и Кристалопиги кон Албанија, Евзони (Богородица) кон Северна Македонија, Нимфеа кон Бугарија и Кипи кон Турција, влезот во Грција е дозволен само за одредени категории и исто така со негативен ПЦР-тест.
Овие гранични премини се отворени од 7 часот наутро до 23 часот, а забраната не важи за грчки државјани, за лица кои имаат дозвола за престој и лица кои живеат во Грција, за влез на лица со неопходни професионални или медицински причини за кои имаат и потребни документи, како и за транзит на болнички возила кои од Косово преку Северна Македонија влегуваат во Грција за хоспитализирање пациенти членови на дипломатскиот, воениот или административниот персонал на земјите членки на ЕУ и ЕУЛЕКС на Косово.
Втората министерска одлука се однесува на забраната за влез во Грција на државјани на трети земји, со исклучок на државјаните на Австралија, Грузија, Канада, Јапонија, Нов Зеланд, Руанда, Јужна Кореја, Тајланд, Тунис, Уругвај и Обединетите Арапски Емирати.
Исто така, исклучок се и одредени категории граѓани, како што се медицинскиот персонал и здравствените работници, оние кои имаат дозвола за престој во земја членка на ЕУ или земја од шенген-зоната, членови на владини мисии, дипломати, превозници, возачи на камиони што пренесуваат стоки, транзит патници, студенти, лица кои се грижат за стари лица и лица со инвалидитет, како сезонски земјоделски работници.