Управен суд за разрешувањето на Дамева: Одлуката на Судскиот совет е нејасна, без докази и законска поткрепа

Според ТВ Сител, судот ги анализирал сите записници од седниците, ама не можел да најде објаснување зошто Судскиот совет гласал недоверба за Дамева

Разрешувањето на Весна Дамева, поранешната претседателката на Судскиот совет е нејасно, ниту законски поткрепено. Вака Управниот суд ја образложил одлуката со која се прифатила тужбата на Дамева и одлучува дека таа треба да се врати на чело на советот, пренесува ТВ Сител, повикувајќи се на неофицијални судски извори.

Според ТВ Сител, судот ги анализирал сите записници од седниците, ама не можел да најде објаснување зошто Судскиот совет гласал недоверба за Дамева.

„Одлуката е нејасна, односно Судски совет не дал никакви образложени причини поради кои го разрешува претседателот, ниту пак ги навел доказите врз основа на кои е утврдена фактичката состојба. Судски наведува дека со мнозинство на гласови на членовите со право на глас, била изгласана недоверба на Дамева како претседател, по што била и донесена одлука за нејзино разрешување, меѓутоа, не се наведени причините поради кои барањата, предлозите и тврдењата на тужителот не биле земени во предвид“,

пишува во одлуката на Управен, пренесува ТВ Сител.

Управниот суд го поништи разрешувањето на Весна Дамева – се враќа на чело на Судскиот совет

За Управниот суд е нејасно и кој закон Судски го применил при разрешувањето.

Оттаму потсетуваат дека Законот за Судски совет прецизно утврдил како член на советот се повикува на одговорност.

„Во членот 36 од Закон за Судски совет, такстативно е наведена надлежноста на советот, меѓу кои, советот одлучува и за дисциплинска одговност за член на советот, но никаде не е наведено дека истиот има надлежност да одлучува за изгласување недоверба на претседателот, ниту за постапка за утврдување негова одговорност“,

образложува Управниот суд.

Засега е нејасно кога и како Судскиот совет ќе ја спроведе одлуката на Управниот суд.

Судскиот совет за враќањето на Дамева: За одлуката дознавме од медиумите, ќе чекаме официјално да ја добиеме, потоа ќе постапиме

Од Судскиот совет вчера за „360 степени“ одговорија дека ќе ја чекаат пресудата на Управниот суд, за која изјавија дека дознале од медиумите.

„Кога официјално ќе ја добиеме пресудата, тогаш ќе постапиме по неа“,

велат од Судскиот совет.

Инаку, по оваа пресуда на Управниот суд никој нема право на жалба.

Според неофицијални информации, но според пракса од други предмети, Судскиот совет откако ќе ја добие пресудата од Управниот суд има рок од 30 дена да постапи по неа. Се очекува членовите на Судскиот совет одлуката да ја разгледаат на закажана седница.

Оваа одлука на Управниот суд денеска ја потврди и министерот за правда Кренар Лога.

Во соопштение рече дека Управниот суд ја поништи одлуката за разрешување на Весна Дамева од претседател на Судскиот совет, како незаконска, со што таа се враќа на претседателското место во Судскиот совет.

Ден по одлуката на Управниот суд, опозициската ВМРО-ДПМНЕ ги повика членовите на Судскиот совет да си поднесат оставки.

„Последниот пример кој Управниот суд го донесе решението за поништување на одлуката за разрешување на Весна Дамева од позицијата претседател на Судскиот совет е само уште ден доказ за катастрофата која се случува во судството. Судскиот совет, тело кое треба да одлучува и суди за работата на судиите во Македонија, прерасна во циркус во кој главните улоги ги толкуваат нарачателите и стопаните од ДУИ и СДС. Да имаа грам достоинство, членовите на Судскиот совет уште вчера ќе си поднесеа оставка. Впрочем работата на правосудните органи, вклучително и Советот беа критикувани и во најлошиот извештај од Европската комисија. Токму затоа, поради овој хаос во судството и обвинителството народот има 1 отсто доверба во судството. Со ДУИ и СДС, граѓаните не можат да очекуваат независен правосуден систем во државата“,

пишува во соопштението од опозициската ВМРО-ДПМНЕ.

Дамева беше отстранета од функцијата на седница на 26 април годинава. На седница нејзиниот заменик Селим Адеми побара да се гласа за нејзино разрешување.

Дамева поднесе тужба до Управен, но и кривична до ОЈО Скопје за начинот на кој беше разрешена од претседателка на Судскиот совет

„За“ гласаа седум члена, по што тој констатира дека претседателката е разрешена и за утредента закажа нова седница за избор на нов претседател.

По разрешувањето, Дамева во мај поднела тужба до Управниот суд за начинот на кој беше разрешена од функцијата, а до Основното јавно обвинителство (ОЈО) Скопје доставила и кривична пријава.