При вонредниот надзор, инспекторите на АХВ утврделе низа недоследности како продажба на замрзната чорба, пуштање во промет на замрзнати подготвени месни производи како плескавици и раженчиња, подготовки од месо без декларација
Околу сто килограми небезбедно месо и месни подготовки уништија инспекциските служби на Агенцијата за храна и ветеринарство (АХВ) при вонредни надзори на ресторани, месарници и маркети во Куманово.
При надзорите во посочените објекти во Куманово, инспекторите утврделе низа недоследности како продажба на замрзната чорба, пуштање во промет на замрзнати подготвени месни производи како плескавици и раженчиња, подготовки од месо без декларација. Меѓу недоследностите наишле и на измината важност на санитарни книшки на вработени кај оператори со храна и непоседување комплетна документација.
„Изречени се мерки опомена и парични казни во висина од 100 до 1 000 евра во денарска противвредност, зависно од тежината на прекршокот и големината на операторот со храна“,
информираат од АХВ.
Од Агенцијата информираат дека со вонредниот инспекциски надзор биле опфатени и два големи супермаркети кај кои не биле утврдени неправилности.