Станува збор за најголем поединечен заем во историјата на Унгарија, во услови кога јавниот долг на оваа земја е на рекордно високо ниво од 140 милијарди евра (73,5 отсто од БДП), а буџетскиот дефицит е 6,7 отсто од БДП, па Будимпешта има очајна потреба од готовина – пишува „Политико“
Унгарија ја подигнала милијардата од Кина на 19 април. Случајно или не, дваесет дена подоцна, веднаш по победата на изборите, Христијан Мицкоски најави „финансиски пакет во соработка влада со влада во вредност од една милијарда евра, со исклучително поволни услови”. Неодамна се испостави дека финансискиот пакет се договара токму со Унгарија
Унгарија позајмила една милијарда евра, што е најголем заем досега на Будимпешта, од три кинески банки оваа пролет – открива информација објавена на веб-сајтот на унгарската владина агенција за јавен долг, а пренесува „Политико“.
Кредитот од Кинеската банка за развој, Експорт-импорт банката на Кина, како и од унгарската испостава на Банката на Кина, е целосно повелечен на 19 април годинава, а мора да се врати за три години.
„Политико“ пишува дека властите во Будимпешта не ја објавиле информацијата. Таа првпат е обелоденета вчера од бизнис-изданието „Портфолио“, а потоа потврдена од владината агенција задолжена за долгот.
Оваа позајмица, пишува „Политико“, доаѓа во време кога Будимпешта ги зајакнува односите со Пекинг. Кинески компании, како што вели министерот за надворешни работи, Петер Сијарто, имаат инвестирано околу 16 милијарди евра во Унгарија – од производство на електрични автомобили, до технолошки развој преку гигантот „Хуавеи“.
„Договорот за позајмица дозволува финансирање на инвестиции во инфраструктурата и енергетскиот сектор, меѓу другото“,
изјавиле од владината агенција за „Портфолио“.
Сијарто уште во мај најави заеднички проекти со Кина во својата држава, како брза железничка линија до аеродромот во Будимпешта, товарна железничка линија околу главниот град, нафтоводи помеѓу Унгарија и Србија, како и нуклеарна соработка.
„Развивме висок степен на заемна доверба. Нашите билатерални односи се најдобри во историјата и тргнати се на златно патување“,
изјави кинескиот претседател Си Ѓинпинг пред посетата на Будимпешта во мај годинава.
Само неколку месеци подоцна, откако Унгарија го презеде претседавањето со ЕУ, премиерот Виктор Орбан замина на посета во Пекинг.
„Политико“ пишува дека јавниот долг на Унгарија е на рекордно високо ниво од 140 милијарди евра (73,5 отсто од БДП), а буџетскиот дефицит е 6,7 отсто од БДП, па Будимпешта има очајна потреба од готовина. Таа сè уште чека милијарди евра од европските фондови.
Заемот од Кина е највисоката ставка во државниот долг, а втората е, исто така, заем од Кина за проектот за железница Будимпешта – Белград од 877 милиони евра.
И додека „Портфолио“ забележува оти каматната стапка за кредитот е променлива, унгарската влада не открива повеќе детали за висината на каматната стапка, начинот на отплата или други детали.
Коинциденција
Информациите од Будимпешта за заем од една милијарда евра од Кина доаѓаат во период кога премиерот Христијан Мицкоски најавува заем од половина милијарда евра од Унгарија во договор влада со влада.
Поточно, првичните информации беа дека позајмицата ќе изнесува една милијарда евра, колку што е и унгарскиот кредит од Кина, а Мицкоски ги пласираше на 9 мај или дваесет дена откако Унгарија го зела кредитот од Кина.
„Можам да најавам еден финансиски пакет во соработка влада со влада во вредност од една милијарда евра, со исклучително поволни услови. Со добар грејс-период, со исклучително атрактивна каматна стапка“,
изјави Мицкоски еден ден по парламентарните избори, во настап на ТВ Канал 5.
На 11 јули, на маргините на Самитот на НАТО во Вашингтон, Мицкоски се сретна со унгарскиот премиер Виктор Орбан и објави дека договориле специјална економска соработка, која во оваа фаза подразбира заем од Унгарија за земјава од 500 милиони евра.
„Имајќи предвид дека воспоставуваме специјална економска соработка, тоа ќе подразбира дека во иднина кога ќе има потреба од такво нешто, ќе можеме повторно да се обратиме до нашиот специјален економски партнер, а тоа е унгарската влада, и да побараме дополнителна поддршка што ќе биде потребна за македонската економија“,
рече Мицкоски во видеообраќање по средбата со Орбан, споделено од владината прес-служба.
Деновиве, пак, во интервју за ТВ Телма, прашан од каде му се парите на Виктор Орбан за да ѝ позајми на Македонија, премиерот Мицкоски коментираше:
„Ова е исто како сега вие да земете од две шишиња во чашава, да ставате вода и да речете до половина е од левото шише, од половина нагоре е од десното шише – тоа е невозможно да се каже. Заемот е влада со влада. Дали тие ги обезбедуваат парите на отворен пазар или од сопствени извори? Не знам од каде Унгарија ги обезбедила парите. Мене ме интересира нашиот договор и тоа ќе биде дел од закон којшто треба да помине во владина седница и на парламент, кој нема шверцерски да биде протнат, со европски знамиња. Сме заштедиле 100 и кусур милиони евра и место да кажеме алал да му е, ние велиме од каде му се парите”.