Украинските сили постигнаа значаен напредок во два од четирите окупирани региони од Русија – Херсон на југ и Луганск на исток кои Москва ги анектираше минатата недела
Портпаролот на Кремљ, Димитриј Песков, тврди дека областите Луганск и Донецк се дел од Русија, но рече дека Кремљ ќе продолжи со консултациите со населението во врска со границите на регионите Херсон и Запорожје
Украинските сили ја пробија руската одбрана на југот на земјата и ја проширија својата офанзива на исток постигнувајќи значителен напредок во два од четирите региони окупирани од Русија кои Москва ги анектираше минатата недела, пишува Ројтерс.
Постигнувајќи го својот најголем пробив на југот од почетокот на војната, украинските сили повторно зазедоа неколку села вдолж стратешката река Днепар, изјавија украинските власти и лидерот инсталиран од Русија во областа.
Лидерот инсталиран од Русија во регионот Херсон на југ, Владимир Салдо, признал оти украинските сили пробиле во близина на Дудчани – град на реката Днепар, околу 30 километри јужно од претходната линија на фронтот.
„Постојат населби кои се окупирани од украинските сили“,
рече Салдо.
Во меѓувреме, на исток, трупите на Киев продолжија со напредувањето, при што полека навлегуваат во Луганск, област која минатата недела беше анектирана од Москва, а претходно беше под речиси целосна руска контрола.
Во саботата украинските сили повторно го зазедоа важниот град Лиман на исток, кој се наоѓа во близина на регионалната граница на Луганск. Извештаите сугерираат дека Украинците се движат кон градовите Кремина и Сватове во Луганск, кои се под контрола на Русија.
Украинскиот претседател Володимир Зеленски во своето обраќање до јавноста синоќа изјави дека армијата на Украина зазела градови во голем број области, без да даде детали.
„Ослободени се нови населени центри во неколку региони. Тешки борби се водат во неколку сектори на фронтот“,
рече Зеленски во видео обраќањето.
Во понеделникот портпаролот на Кремљ, Дмитриј Песков, привлече потсмев на интернет откако призна дека Русија сè уште одлучува кои области ги „анектирала“ сугерирајќи дека Москва не знае каде се нејзините самопрогласени граници. Песков тврди дека областите Луганск и Донецк се дел од Русија, но рече дека Кремљ ќе продолжи со консултациите со населението во врска со границите на регионите Херсон и Запорожје.
Киев вети дека ќе ја врати целата територија анектирана од Русија, вклучувајќи го и Крим, заземена од руските трупи во 2014 година.