Илија Витиук, шеф на одделот за кибербезбедност на Службата за безбедност на Украина (СБУ), во разговорот за Ројтерс открил детали за хакерскиот напад, за кој рекол дека предизвикал катастрофални последници, а имал за цел да нанесе психолошки удар и да собере разузнавачки информации
Руските хакери успеале да упаднат во системот на украинската телекомуникациска компaнија „Киевстар“ и биле во него најмалку од мај минатата година, изјавил за Ројтерс шефот за кибербезбедност на Украина, пренесува британски „Гардијан“.
Нападот, како што навел тој, треба да биде големо предупредување за Западот.
Хакирањето, кое се опишува како едно од најдраматичните по руската инвазија на Украина пред речиси две години, ги прекинало услугите што најголемиот украински телекомуникациски оператор ги обезбедува за околу 24 милиони корисници, а тоа траело со денови, почнувајќи од 12 декември минатата година .
Илија Витиук, шеф на одделот за кибербезбедност на Службата за безбедност на Украина (СБУ), во разговорот за Ројтерс открил детали за хакерскиот напад, за кој рекол дека предизвикал катастрофални последници, а имал за цел да нанесе психолошки удар и да собере разузнавачки информации.
„Овој напад е голема порака, големо предупредување, не само за Украина, туку и за целиот западен свет да разбере дека всушност никој не е недопирлив“,
рекол Витиук.
Тој посочил дека телекомуникацискиот оператор, цел на нападот, е богата приватна компанија која доста инвестирала во кибербезбедноста.
Нападот избришал „речиси сè“, вклучително и илјадници виртуелни сервери и компјутери, рекол тој, опишувајќи го како веројатно прв пример на деструктивен кибернапад што „целосно го уништи јадрото на телекомуникацискиот оператор“.
„Засега, можеме безбедно да кажеме дека тие беа во системот барем од мај 2023 година
Не можам да кажам во моментов, колку време имаа… целосен пристап, веројатно барем од ноември“,
рекол тој.
Russian hackers were inside Ukrainian telecoms giant Kyivstar’s system from at least May last year in a cyberattack that should serve as a ‘big warning’ to the West, Ukraine’s cyber spy chief told @Reuters https://t.co/pmnHuI9YQn pic.twitter.com/8F0PeWmUST
— Reuters (@Reuters) January 4, 2024
Според проценките на украинската безбедносна служба, хакерите биле во можност да украдат лични податоци, да лоцираат телефони, да пресретнуваат СМС-пораки и можеби да хакираат налози на Телеграм, со нивото на пристап што го имале, изјавил шефот за кибербезбедност на СБУ.
Портпаролот на телеком-гигантот „Киевстар“ изјавил дека компанијата тесно соработува со СБУ за да го истражи нападот и дека ги презема сите неопходни чекори за елиминација на идни ризици.
„Не се откриени факти за истекување на лични и податоци за претплатниците“,
додал портпаролот.
Инаку, како што навел Витиук, хакерискиот напад немал големо влијание врз војската на Украина.
„По главниот и голем упад, имаше голем број нови обиди насочени кон нанесување поголема штета на операторот.
Кога говориме за детекцијата на дронови и откривањето на проектили, за среќа, не, оваа ситуација не влијаеше силно на нас“,
навел шефот за кибербезбедност на СБУ.