Разузнавачки извори, во изјава за западни медиуми, тврдат дека „платеници поврзани со руски разузнавачки структури“ го зголемиле своето присуство во Украина, поради што расте стравот кај некои членки на НАТО дека Русија би можела да бара изговор за инвазија
САД денеска соопштија дека ја преместуваат својата амбасада од Киев во западниот украински град Лавов, наведувајќи го како причина „драматичното забрзување“ на распоредувањето руски сили долж украинската граница.
„Амбасадата ќе продолжи со својата работа и ќе соработува со украинските власти“,
изјави американскиот државниот секретар Ентони Блинкен.
Тој упати повик до сите останати американски граѓани во Украина „веднаш да ја напуштат таа држава“.
Францускиот министер за надворешни работи Жан-Ив Ле Дриан, пак предупреди денеска дека „сите елементи“ се во прилог на тоа дека Русија може да изврши „голема офанзива“ против Украина, откако Москва распореди илјадници војници на нејзините граници.
„Дали ги има сите елементи за голема офанзива на руските сили во Украина? Да ги има, можно е, можно е брзо да се случи“,
изјави Ле Дриан за телевизијата Франс 5.
Тој додаде дека ништо не сугерира дека Москва се уште донела одлука.
Тројца западни разузнавачки извори тврдат во изјава за западни медиуми дека „платеници поврзани со руски разузнавачки структури“ наводно го зголемиле своето присуство во Украина, поради што расте стравот кај некои членки на НАТО дека Русија би можела да бара изговор за инвазија на Украина, објави на својот сајт Телеграф, пренесувајќи извештај на новинската агенција Ројтерс.
Повикувајќи се на неименувани извори, британската агенција пренесува дека се зголемува стравувањето оти руската инвазија ќе следи по војна со информации и „кибер напади врз клучни инфраструктурни системи“, како што се електричната и гасната мрежа.
Изворите предупредуваат на наводни дејствија на руски платеници кои би можеле да ја „парализираат Украина со извршување целни егзекуции и користење на специјализирано оружје“.
Русија ги зајакна своите воени сили распоредени на границата со Украина во текот на викендот, изјави денеска портпаролот на Пентагон, Џон Кирби, и покрај најавата на Москва дека завршува некои од воените вежби.
„Рускиот лидер Владимир Путин „продолжува да испраќа сили долж границата со Украина и во Белорусија, дури и во текот на изминатиот викенд, каде веќе има над 100 000 војници. Не се само бројките. Таму има на располагање комбинирано оружје, речиси се, од оклопни единици до пешадија, како и специјални операции за кибер напади и воздушна и ракетна одбрана“,
нагласи портпаролот на Пентагон.
Во меѓувреме, британскиот премиер Борис Џонсон денеска изјави дека ситуацијата во Украина е „многу, многу опасна“ и, според него, можна е руска инвазија во следните 48 часа.