Високиот советник на Зеленски, Михајло Подољак, рече дека е апсурдно да се сугерира дека западните земји ќе го натераат Киев да преговара за условите на Москва, бидејќи тие ја снабдувале Украина со оружје за да ги протераат руските сили од нејзината земја
Украина негираше дека била притисната од Западот да преговара со Русија, а украинските власти повторија дека преговорите може да се случат само доколку Русија се откаже од сите окупирани територии, пренесува Ројтерс.
Изјавите дојдоа неколку дена откако Вашингтон пост објави дека САД го охрабриле Киев да сигнализира подготвеност за разговори. Веста се совпаѓа и со изборите за Конгресот во САД, кои, според Ројтерс, би можеле да бидат тест за поддршката на Западот за Украина.
Украинскиот претседател Володимир Зеленски во доцните ноќни обраќања пред да им се обрати на светските лидери на самитот за климата, прочита, како што рече, „сосема разбирливи услови“ за мировни преговори:
„Уште еднаш – враќање на територијалниот интегритет, почитување на Повелбата на Обединетите нации, компензација за сета воена штета, казнување на секој воен злосторник и гаранции дека тоа нема да се повтори“.
Зеленски рече дека Украина постојано предлагала такви разговори, но дека секогаш добивала „луди руски одговори со нови терористички напади, гранатирање или уцени“.
Портпаролот на Кремљ, Дмитриј Песков, во понеделникот го повтори ставот на Москва дека е отворена за разговори, но рече дека Киев ги отфрла. Московските власти во неколку наврати изјавија дека нема да преговараат за територијата за која тврдат дека Русија ја припоила од Украина.
Високиот советник на Зеленски, Михајло Подољак, рече дека е апсурдно да се сугерира дека западните земји ќе го натераат Киев да преговара за условите на Москва, бидејќи тие ја снабдувале Украина со оружје за да ги протераат руските сили од нејзината земја.
„Украина добива доста ефективно оружје од своите партнери, пред се од САД. Ја туркаме руската армија од територијата. И во таа смисла, да не принудат на преговарачки процес, а всушност да го признаеме ултиматумот на Руската Федерација, е глупост! И никој нема да го направи тоа“,
рече тој во интервју за Радио Либерти.
Тој посочи дека нема „принуда“ во односите на Украина со Вашингтон и дека сугестиите дека Западот ја принудува Украина да преговара се дел од руската „информативна програма“.