Управата за јавни приходи ги презентираше највисоките годишни бруто-приходи пријавени во Годишната даночна пријава за 2018 година.
На врвот на листата е жителка од Скопје која остварила највисок годишен бруто-приход од над една милијарда и 56 милиони денари. Истовремено, таа остварила и највисока капитална добивка во последниве десет години, и тоа повисока од 841 милион денари.
Втор на листата е граѓанин од Скопје со годишен бруто-приход од над 453 милиони денари.
Меѓу граѓаните со најголеми годишни бруто-приходи е и жител на Гевгелија со остварени над 300 милиони денари, граѓанин од Струмица кој пријавил повеќе од 250 милиони денари и тетовец кој остварил над 225 милиони денари.
Највисоки плати во здравството, трговијата и информатичките технологии
Највисоката годишна бруто-плата во 2018 година е исплатена во секторот здравство и надминува 183 милиони денари. Највисоки плати биле исплатени и во трговијата со тутунски производи, компјутерското програмирање и изградбата на станбени и нестанбени објекти.
Во 10. топ рангирани на листата на највисоки приходи од самостојното вршење дејност се наоѓаат адвокати, нотари, извршители и угостители. И во овој дел доминираат скопјани, а највисокиот приход изнесува нешто повеќе од 46 милиони денари.
Најголема пензија од странство пријавил жител на Скопје со приход повеќе од 5 милиони денари. Скопјанец е и најсреќниот добитник по основ на игри на среќа и пријавил повеќе од 53 милиони денари.
Според возраста пак, највозрасното лице кое остварило приход од над 1 милион денари имал 99 години. Најмладото лице пак, е родено во 2018 година и по основ на доход од девиденда остварило над 1 милион денари. Најмладото лице во групата над 10 милиони денари приход имало 21 година.