Министерството за економија заедно со АД ЕСМ треба да направат детална анализа во однос на вклчувањето на сите училишта на регулираниот пазар, потоа вклучување кај ЕСМ снабдување на институциите од здравствениот сектор со оглед на тоа дека тие плаќаат голем дел од нив на краен снабдувач и треба да се стават на посигурен снабдувач на електрична енергија, вели премиерот
Вклучувањето на сите училишта на регулираниот пазар на електрична енергија и вклучување на институциите од здравствениот сектор кај ЕСМ снабдување нема во голем дел да влијае на зголемување на цената на струјата на регулираниот пазар, смета премиерот Димитар Ковачевски.
„Таа мерка не е предложена еднострано. Знаете дека имаше седница на Економскиот совет во проширен состав на која покрај владините министри од економските ресори присуствуваа и сите директори на државни претпријатија од енергетскиот сектор, претставници на големи приватни компании од енергетскиот сектор, стопански комори, академската заедница, Регулаторната комисија за енергетика. И тогаш кажавме дека Министерството за економија заедно со АД ЕСМ треба да направат детална анализа во однос на вклчувањето на сите училишта на регулираниот пазар, потоа вклучување кај ЕСМ снабдување на институциите од здравствениот сектор со оглед на тоа дека тие плаќаат голем дел од нив на краен снабдувач и треба да се стават на посигурен снабдувач на електрична енергија“,
изјави денеска премиерот Ковачевски во одговор на новинарско прашање по посетата на Општата градска болница во Гостивар.
Ковачевски рече дека штом ќе бидат усогласени барањата на компанијата, на стопанството, со регулативите за кои е задолжена Регулаторната комисија за енергетика, ќе се излезе со финална солуција како ќе изгледа префрлањето на нови институции на регулираниот пазар.
„Нормално дека останува на Регулаторната комисија за енергетика да го разгледа во детали барањето кое што го има не само Владата, туку и другите институции и на крајот да најдеме солуција. Досега се покажа дека со напорна работа, со добра координација помеѓу сите институции може да се изнајде решение како што се изнајде решение за субвенционирање на 80 отсто од цената на електрична енергија на граѓаните и на две третини од електричната енергија на регулиранот пазар за малите потрошувачи за 72 илјади компании, сметам дека и за ова ќе се изнајде решение“,
рече Ковачевски.
Тој потенцираше оти цената на струјата ја одредува Регулаторната комисија за енергетика и оти таа зависи од многу фактори, а не само од еден.
„Зависи од цената на енергенсите која што гледаме дека расте на светските берзи, зависи од цената на транспортот која што гледаме дека расте на светските берзи, зависи од цената на основните суровини што се користат за одржување на електроенергетските постројки, зависи од цената на гасот, зависи од цената на мазутот, на јагленот. Од ова одлука, исто така, може да зависи, меѓутоа префрлањето на основните и на средните училишта на регулираниот пазар има многу помало учество од тоа што го имаат порастот на цените на другите енергенси ако ја погледнете формулата за формирање на цената“,
рече Ковачевски.
Премиерот истакна дека прават се за да обезбедат стабилно снабдување со електрична енергија и повика на рационално трошење на овој ресурс.
„Повикувам согласно можностите сите да придонесеме кон намалување на потрошувачка на енергија дали со инвестиции во зголемување на ефикасноста на објектите или со мали промени на навиките кои нема да одземат од комфор, а на крајот ќе значат заштеда и на ресурси и на пари“,
додаде Ковачевски.
Исто така, премиерот додаде дека откако сите министерства добија задача да штедат и да ја намалат потрошувачката на електрична енергија за 20 отсто, заштедата која ја имаат изминатиот месец, во однос на истиот месец лани, е 20 отсто.