Раководството на СОНК, додаваат од СДСМ, одби ново предложено зголемување на платите во образованието и детската заштита за 12 отсто, и тоа во време на најголема светска енергетска криза
Поради политичка агенда на раководството на СОНК децата, учениците се надвор од училишните клупи, надвор од образовниот процес кој толку им е потребен, реагираат од СДСМ во однос на вчерашната одлука на Синдикатот за образование, наука и култура (СОНК) за продолжување на штрајкот во средните и основните училишта.
„Уцените и политичкото дејствување на раководството на СОНК се на штета на учениците и наставниот процес. Учениците мора да се вратат на настава. Правото на децата за образование е уставно загарантирано и не смее да се дозволи некој заради политичка агенда да им го загрозува“,
стои по писменото соопштение од СДСМ.
Раководството на СОНК, додаваат од партијата, одби ново предложено зголемување на платите во образованието и детската заштита за 12 отсто, и тоа во време на најголема светска енергетска криза.
Вчера, лидерот на СОНК, Јаким Неделков, истакна дека предлогот на Владата за 12-процентно зголемување на платите е неприфатлив за членството на Синдикатот откако претходно го одбија и предлогот за зголемување на платите за 10 отсто.
„Од вкупно 480 синдикални организации коишто дадоа податоци за нивното изјаснување во однос на договореното со Владата, 388 беа за продолжување на штрајкот од утре, а само 83 беа за прекинување на штрајкот. Најголемиот дел од оние кои што се изјаснија за прекинување на штрајкот се синдикалните организации за детската заштита, а без исклучок огромниот број на оние кои се за продолжување на штрајкот се колегите и колешките од основното и средното образование“,
истакна вчера лидерот на СОНК, Неделков.
Според тоа, штрајкот во основните и средните училишта во земјава продолжува и денеска. За разлика од училиштата, од денеска во градинките ќе се згрижуваат деца.